Governu kria Konsellu Kombatente Libertasaun Nasionál

Governu ohin aprova ona dekretu-lei ida ne’ebé kria Konsellu Kombatente Libertasaun Nasionál, ne’ebé defini 03 marsu hanesan Loron Nasionál Veteranu sira nian, fó sai ohin primeiru-ministru.

"Objetivu sentrál hosi órgaun ne’e maka dinamiza kontribuisaun veteran sira ba dezenvolvimentu nasaun ninian", dehan Rui Maria de Araújo ba jornalista sira.

"Ami hein katak konsellu ne’e bele sai hanesan parseiru ida ne’ebé kredível iha dinamizasaun dezenvolvimentu ekonómiku. Iha potensialidade barak entre veteran sira hodi kontribui ho maneira ne’ebé pozitivu ba dezenvolvimentu nasaun ninian", nia destaka.

Primeiru-ministru fó ezemplu hanesan papel "mobilizasaun" veteran sira nian iha setór sira hanesan agrikultura no turizmu, iha kazu ikus nian ne’ebé apoi iha programa "turizmu istóriku" ajuda fó koñese "fatin hothotu hosi guerrilla nian".

Hafoin dekretu aprova hosi Prezidente Repúblika no publika, sei kria komisaun instaladora ida ne’ebé, iha fulan neen oin mai, formaliza ezisténsia hosi Konsellu ne’e.

Desizaun Governu nian bazeia iha proposta ne’ebé aprezenta ona hosi Komisaun Omenajen hosi Ministériu Solidariedade Sosiál.

Dekretu ohin nian ne’ebé aprova ona hodi defini estrutura, funsionamentu no objetivu CCLN.

Iha reuniaun ohin ninian Governu aprova mós rezolusaun ida ne’ebé kria komisaun organizadora hosi selebrasaun tinan 500 bainhira misionáriu portugés sira to’o mai Timor-Leste, ne’ebé sei komemora iha tinan ida ne’e.

SAPO TL ho Lusa