Fundasaun Mahein “Honra” iha Kuartél Jeral PNTL

Depois iha mudansa estrutura lideransa ba Komandu Jeral Polisia Nasional Timor-Leste – PNTL, Fundasaun Mahein (FM) ne’ebé durante tau matan ba seitor seguransa hetan oportunidade hodi halo audensia ho Komandante Jeral PNTL foun Komisariu Julio Hornai, iha semana dahuluk fulan Abril tinan 2015. Objetivu prinsipal husi sorumutu ida ne’e atu bele hametin parseira serbisu hodi dezenvolve instituisaun polisial iha Timor-Leste.

Nu’udar sosiedade sivil ne’ebé durante ne’e halo monitorizaun, peskiza no advokasia ba seitór defeza no seguransa sai ajente importane mos iha prosesu dezenvolvimentu instituisaun PNTL. Komandu Jeral konsidera prezensa FM sai parseiru importante no promote atu serbisu hamutuk hodi hadia no dezenvolve diak liu tan Instituisaun PNTL nia serbi ba povu no nasaun.

Konsiderasaun ida ne’e nu’udar pontu pozitivu ida husi sosiedade sivil iha Timor-Leste, partikularmente FM.

Pontus prinsipal hirak ne’ebé sai tópiku sentral ba FM toka durante sorumutu maka asuntu disiplina, transparansia no akauntabilidade, serbisu intelejensia, asuntu promosaun, problema jestaun fronteira,implementasaun planu estratejiku PNTL 2014 – 2018 no asuntu seluk ne’ebé ninia relevansia ho dezenvolvimentu Instituisaun PNTL. Komandante Jeral PNTL konsidera problema hirak ne’e pretente duni no sei halo esforsu hodi hadia no kompleta durante ninia mandatu.

Komandu PNTL rasik mos rekuinese katak Instituisaun PNTL sei infrenta hela problema barak intermuz profesionalizmu instituisaun, transparansia no akuntabilidade, disiplina membru polisia sira ne’ebé sai hanesan notas mean ba dezempeñamentu Instituisaun PNTL. Pontu pozitivu ida husi Komandu Jeral foun maka apresia ba sosiádade sivil nia krítika ba Instituisaun PNTL nu’udar hanoin ida atu fanu lideransa instituisaun no governu hodi hadia erru ne’ebé mosu iha Instituisaun PNTL durante ne’e.

Ho ida ne’e, Komandu Jeral kontinua husu krítika konstrutivu husi FM nu’udar ajente kontrolu ida ne’ebé bele fo hanoin hodi hadi’a faillansu hirak ne’ebé akontese iha Instituisaun PNTL nia laran. Husi rezultadu enkontru ne’e mos Komandu Jeral husu ajuda FM atu apoiu ba tradusaun lei seguransa nia ne’ebé maioria hakerek iha lian Portugues ba lian Tetun atu bele hafasil Komandu no membru PNTL sira kompriende.

Konkulzaun husi sorumutu ne’e hatudu katak Komandu Jeral iha vontade diak hodi koopera ho sosiedade sivil hodi hadi’a diak liu tan serbisu polisial iha komunidade, intermuz atuasaun no implementasaun lei no orden.

Husi preoukupasaun no sujestaun hirak ne’e, FM mos rekomenda ba Komandu Jeral PNTL maka hanesan tuir mai ne’e;

1. Rekomenda ba Komandu Jeral PNTL atu funsiona diak Sentru Nasional Operasun – SNO hodi nune’e bele update situasaun seguransa iha rai-laran hodi nune’e bele minimiza rumores hirak ne’ebé halo povu senti tauk no moris la seguru.

2. Rekomenda ba Komandu Jeral PNTL atu kontinua hadia dezempeñamentu instituisaun no promove transparansia no akuntabilidade iha Instituisaun PNTL nu’udar asaun ida hodi kontribui ba boa-governasaun.

3. Rekomeda ba Komandu Jeral atu foti medida maka’as hasoru elementu sira ne’ebé viola lei no regulamentu hodi prosesa tuir presedementu legal.

4. Rekomenda mos ba Komandu Jeral hadia sistema promosaun iha PNTL atu nune’e labele hamosu diskriminasaun no Korupusaun Koluzaun Nepotizmu – KKN iha futuru.

Fundasaun Mahein