KAY RALA XANANA GUSMÃO: “GOVERNU SEI LA SELU OBRA LAIHA KONTRATU’’

Ministru Planeamentu no Investimentu Estratéjiku (MPIE), Kay Rala Xanana Gusmão afirma, Governu sei laselu obra sira ne’ebé emprezariu sira halo laiha kontratu, tanba kria problema barak ba Estadu.

Tanba Xanana dehan, kuandu hotu-hotu komesa obra ne’ebé laiha kontratu to’o ikus laiha kontrolu ba iha kualidade, entaun Governu laiha osan atu selu.

“Ha’u aviza dala ida tan, laiha emprezariu ida, atu hahú obra ida kuandu laiha kontratu. Kuandu laiha kontratu favor lalika komesa obra ne’e,”dehan Xanana Gusmão ba setor privadu sira, bainhira partisipa iha diskusaun meza redonda entre Governu ho setór públiku no setór privadu iha Timor Plaza, Kuarta (27/5).

Tanba ne’e mak , Xanana husu ba setor privadu sira atu koalia ba malu, hodi komesa mellora setór privadu ida-idak nia intervensaun, hodi sente katak, nain duni. Kuandu eru sira ne’e Governu lakoriji, ida ne’e presaun ida ba Estadu.

“Se dialogu ita hetan solusaun ruma ba ita nia problemas, ita tenki koalia honestu uitoan. Ami nia burokrasia hadia dadauk, ne’ebé to’o ona ba, ami ba hasai ita bo’ot sira nia servisu sira ne’e, ita bo’ot sira hirus ami,”dehan Xanana.

Xanana hatutan, se setor privadu sira senti katak, sira tenki partisipa, entaun Governu labele tau ADN no Obras Públikas, maibé setor privadu sira ida-idak ho ninia ema iha ne’eba para akompaña kualidade obra ne’e, tanba obras gasta orsamentu Estadu.

“Atu bainhira ami to’o iha ne’eba, ami dehan katak, yes, la’e ami sobu, i depois imi rezolve. Buat sira ne’e mosu, tanba la’e ita halo estrada ida, ita inaugura tiha, fulan tolu a’at fila fali, ita mak Repúblika Demokrátika yang itu- itu saja tinan-tinan. Tenki koriji buat sira ne’e hotu, no ita bo’ot sira mós tenki ha intropeksaun ida katak, obras foun sira ne’ebé ita bo’ot sira kaer ne’e, kaer arbiru, laiha responsabilidade,”lamenta Xanana.

Xanana mós esplika, Governu iha despezas superfulles, tanba gasta deit osan, maibé sestu Governu ne’e tenta atu redus dadauk maibé setor privadu mós tenki iha‘’business thinking’’.

Eis Xefe Governu ne’e mós lamenta katak, durante ne’e setor privadu balu lahatene poupa osan, tanba simu tiha osan utioan, uza osan ne’e hodi ba pasiar iha Bali, Singapore, no Surabaya. Bainihra gasta tiha osan ne’e hotu tiha, fila fali mai obra ne’e halo la halo, nune’e hela deit.

Xanana dehan, setor privadu tenki buka hatene atu rai dadauk ona osan, labele hanoin deit atu sosa kareta hodi ba tau iha uma atu ema hare katak, imi iha kareta barak.

Maibé Xanana mós dehan, iha setor privadu balu mak iha tiha osan, sira adora osan ne’e, liu fali Maromak, sira lakohi hasai osan ne’e atu halo netik buat ruma hodi dezenvolve rai ida ne’e, atu hatama osan barak liu tan.

“Ita kuriji malu hanesan ne’e, tanba ita bo’ot sira mak sei fó empregu, ita hotu mak hamutuk dezenvolve rai ida ne’e, ha’u fó atensaun ba imi dehan katak, abertu oitoan,”afirma Xanana.tap

Jornal Nacional