ATU RETIRA KOK, TENKE LIU HUSI KARTA ESKRITA

Desizaun Estadu nian atu retira Komando Operasaun Konjunta (KOK) husi Munisípiu Baucau, tenki liu husi karta legal Estadu nian, ne’ebe maka asina husi Prezidenti Republika, Prezidenti Tribunal Rekursu, Parlamentu Nasional ho Governu.

“Se la iha karta eskrita no asina husi ulun bot Estadu nian, maka ha’u sei la garante atu KOK retira no Mauk Moruk sei la fiar hau,” hateten eis Komandante FALINTIL, Cornelio Gama “L-7” ba jornalista sira iha Bidau Mota Klaran, Dili, Kuarta (27/05/2015).

Prezidenti Konselhu Revolusaun Maubere (KRM), Mauk Moruk, haruka ona karta ne’ebe tatoli husai L-7 hodi fo ba Estadu atu retira KOK no retira prosesu iha tribunal hasoru nia, maibe Maijor Jeneral Lere Anan Timur, responde katak, KOK bele retira, maibe justisa ba Mauk Moruk sei la retira.

Ba deklarasaun Maijor Jeneral Lere Anan Timur nian ne’e, L-7 hateten, karta ne’ebe nia lori ba esntrega iha Estadu ne’e legal. Tanba ne’e, Parlamentu Nasional nudar reprezentante povu nian la bele konsidera fali katak, karte ne’e ilegal.

“Hau husu ba Presidente PN ita tenki hare uluk artigu 106 dehan uluk Partidu UDT, Apodeti, KOTA, Trabalista no Fretilin. Fretilin manan tiha halo nusa maka UDT halo golpe hodi rezulta ema rihun atus rua mate,” afirma L-7.

L-7 sublinha katak, funu golpe kontra direitus humanus ne’e tenke levanta hikas no presu ba oin, atu autor sira ne’ebe maka oho povu tenki ba hatan iha justisa nia oin.

“Konselhu veteranus sei lebanta sira ba iha Tribunal, tanba em relasaun Mauk Moruk nian ne’e politika, Mauk seidauk lori kilat ida atu kontra nasaun ne’e,”haklaken L-7.

Governu Kria Deit Violensia

Iha biban ne’e, L-7 mos fo nia observasaun ba loron 100 servisu VI Governu Konstitusional nian ne’ebe maka tuir L-7 la rezolve problema no kria deit maka violensia.

“Primeiru VI Governu durante fulan tolu ne’e nia hanoin deit maka krimi violensia. Tuir lolos Xanana entrega ba PM Rui Maria de Araujo atu rezolve problema, maibe nia tama mai atu halo krimi violensia, ne’e duni Primeiru Ministru ne’e ami FALINTIL la gosta liu. Nia identidade funu nian iha ka lae, nia tur iha ne’eba PM fo deit ba nia, ne’e ami la konkorda ida,” afirma L-7. nax

Jornal Nacional