Governu TL Kontinua Lori Australia Ba Tribunal Arbitrajen Holanda

DILI – Maske Governu Australia intrega fila fali ona dokumentus importante neebe mak Australia hadau iha tinan kotuk, maibe pozisaun Timor Leste nian nafatin lori governu Australia ba Tribunal Internasional Holanda, hodi prosesu kazu nee.

Informasaun nee fo sai hosi Xefe Governu, Rui Maria de Araujo, ba Jornalista sira liu hosi press konfres neebe mak halo iha Palacio Governu wainhira fo sai rejultadu servisu VI Governu Kinta (28/08).

Governu Australia fo fali ona dokumentu neebe mak sira foti hosi asesoris juridiku TL nian iha Australia neehatudu katak sira rekuinese soberania TL nian tanba nee governu hola desijaun atu kontinua fila fali prosesu arbitrajen ba tratatu tasi timor nian ho baje ba ita nia reklamasaun katak tratadu nee halo laos ho boa fe tanba kondisoens neebe impoen iha tratadu nee barak liu mai hosi prosesu espionajen neebe momentu neeba governu Australia halo ba governu TL,” hatete PM Rui Maria de Araujo.

Primeiru Ministru, Rui Maria de Araujo, mos hatutan tan katak desijaun nee governu TL foti ona no sei abansa nafatin ba oin tanba prosesu arbritrajen nee TL suspende ona durante fulan 7 nia laran, tanba hakarak halo negosiasaun hodi bele hetan fila fali dokumentus neebe mak Australia prende nomos atu halo negosiasaun konaba fronteira maritime.

Iha fatin ketak tuir Diretor Ezekutivu Organijasaun Luta Hamutuk, Mericio Akara, mos hatete katak husu ba Ministru Rekursu Naturais atu esplika klaru kazu entre TL ho Australia ba publiku atu nunee ema hotu bele komprende lalaok kazu nee. Informasaun kompletu iha STL Jornal no STL Web, edisaun Sesta (29/5/2015). Thomas Sanches

Suara Timor Lorosae