PR SÃO TOME NO PM CABO VERDE SEI PARTISIPA TINAN 500

Prezidenti da Repúblika (PR) São Tomé e Principe, ho Primeiru Ministru (PM) Cabo Verde konfirmadu ona katak, sira sei mai partisipa iha selebrasaun tinan 500 misionáriu Português sira lori Igreja Katolika tama Timor Leste (TL) ne’ebé sei selebra iha Rejiaun Autonomo Oe-cusse.

Ministru ESTATAL, Dionisio Babo informa katak, sei mai mós nai ulun balun husi nasaun seluk ne’ebé mak atu mai partisipa iha seremonia importante ne’e, maibé to’o agora seidauk komfirmadu.

“Prezidenti ida ne’ebé mak konfirmadu ona atu mai partisipa iha seremonia selebrasaun tinan 500, igreja Katolika tama mai Timor Leste ne’e mak, Prezidente São Tome e Principe no Primeiru Ministru Caboverde, i enveadu espesial husi Mozambique ne’ebé reprezenta Prezidente da Repúblika,”dehan Dionisio Babo ba jornalista sira iha Palacio Prezidensial Aitarak Laran Dili, Sesta (16/10), hafoin hasoru malu ho Prezidente da Repúblika Taur Matan Ruak.

Nia esklarese, Prezidenti ida ho Primeiru Ministru ida ho mós enveadu espesial husi nasaun seluk ne’ebé sei mai reprezenta sira nia Governu.

“Ita sei hein hela nai ulun sira ne’ebé Sr. Prezidenti no Primeiru Ministru haruka, tanba seidauk iha konfirmasaun, rona mós husi Australia katak, Governador Jeral mós atu mai, maibé seidauk iha resposta final,”informa Dionisio Babo.

Nia hatutan, agora dadauk ne’e mós, Governu sei hein hela resposta husi Indonesia nian, kona-ba, sé mak atu mai partisipa iha seremonia importante ne’e.

Nia dehan, atividades iha Oe-cusse ne’e, sei la’o semana ida antes loron 28 Novembru ne’e to’o.

Dinisio relata, atividades sira ne’ebé la’o antes 28 de Novembru mak, atividades religiozu nian, atividades kultura, desportu hanesan, atividades siklismu ne’ebé mak Governu sei organiza husi Dili ba to’o Oe-cusse no motor cross.cos

Jornal Nacional