KAZU EMILIA-MADALENA LAIHA IMPAKTU BA FETO TL

Prezidente Conselho Nacional de Joventude Timor-Leste (CNJTL), Maria Dadi Magno informa, kazu arguida eis mInistra Finansas (MF), Emilia Pires ho kazu eis Vice Ministra Saude (VMS), Madalena Hanjam sei laiha impaktu ba feto Timor Leste sira.

“Relasiona ho figura importante feto ne’ebe ita bele temi dehan feto lider eis ministra finansas Emilia Pires no eis vise ministra saude Madalena Hanjam ne’ebe maka sai ona arguida ba kazu korupsaun no mal administrasaun ne’e ninia impaktu ba feto iha Timor laran ne’e ladun boot, tanba ne’e karakter pesoal ema ida nian ne’ebe ita labele zeneralija feto hotu-hotu,”Maria Dadi Magno ba JN-Diário iha ninia knaar fatin Farol-Dili, Sesta (16/10) semana kotuk.

Nia hateten, maske eis membru nain rua ne’e komete kazu, maibe iha sira ninia mandatu halo ona buat lubuk balu hodi kontribui ba dezenvolvimentu Timor Leste.

Maske nune’e nia deha, kazu arguida Emilia Pires no Madalena Hanjam ne’e nudar esperensia ba feto maluk sira seluk atu nune’e wainhira hetan fiar asume kargu importante iha orgaun Estado tenke uja oportunidade ho diak.

“Ida ne’e mos hanesan reflesaun ba feto hotu-hotu iha TL, ne’ebe wainhira iha fatin ruma oportunidade no fo fiar mai ita bazeia ba ita nia matenek no profesionalizmu, no hakarak fo kontribuisaun, entaun liu husi kazu arguida nain 2 bele sai referensia ba feto TL katak ba oin sei la akontese tan,”afirma nia.

Relasiona ho kazu eis membru governu ne’e nudar referensia ida ba feto maluk sira seluk atu nune’e kuidadu an ho fiar ne’ebe maka Estado ka Governu oferese labele uja sala.

Entretantu iha parrte seluk Diretora Ezekutivu Forum Komunikasaun ba Feto Timor-Lorosa’e (FOKUPERS), Marilia da Silva Alves, afirma prosesu justisa ba eis Ministra Emilia Pires no ba eis vice ministra saude, Madalena Hanjam sei kontinua lao, e so desizaun tribunal maka sei fo sai lia los sala ou la sala.

“Tanba ne’e ami labele foti konkluzaun ida katak bele fo impaktu ba feto TL no internasional, no akuzaun sira ne’e bazeia ba investigasaun ne’ebe mai husi Komisaun Anti Korupsaun (KAK) no Ministeriu Publiku (MP) no sei iha prosesu nia laran, nune’e diretamente la hatun dignidade feto nian,”haklaken Marilia. ves

Jornal Nacional