FKJ Apoiu Fundus Ba Familia Vulneravel

Forum Komunikasaun Joventude (FCJ) hetan fundus husi husi Ministerio Solidaridade Sosial (MSS) ho montante $75,904hodi ajuda fali familia kbi’it laek sira hodi hala’o sira nia negosio.

Diretora Ezekutivu FKJ, Madalena da R. Pinto Baptista, hateten apoiu ida ne’e atu ajuda familia kbi’it laek sira halo negosio hodi sustenta sira nia familia, liu –liu oan sira.  

“Liu husi fundu ki’ik ne’e ami koko atu hadia sira nia moris liu husi halo negosiu,” Diretora FKJ Baptista hateten, iha Balide, Dili.

Alende ne’e, nia dehan, ajudus (ki’ik)  ida ne’e mos ho objetivu atu hamenus numeru trabalho infantil no labarik moris iha estrada ninin iha Timor –Leste, tanba problema sira ne’e mosu kauza husi insufsiente rendimentu familia. 

Tanba tuir nia, maioria labarik sira ne’ebe fa’an sasan iha Dili laran ne’e la eskola, tanba familia laiha kbi’it atu supporta sira nia edukasaun. 

Nia mos rekonese, katak iha Timor-Leste eskola gratuita, maibe familia sira presiza osan hodi sosa instrument eskola nian hanesan pasta, farda eskola, sapatu, livrus no seluk tan. 

Nia informa, iha tinan 2016 ne’e FKJ fo deit apoiu ba familia (uma kain) 10 husi suku Kaikoli, tanba tuir dadus ne’ebe iha, numeru labarik hala’o servisu iha dalan ninin barak husi suku ne’e. 

Kona ba benefisiarius, nia dehan, ekipa FKJ identifika labarik sira iha dalan ninin depois halo verifikasaun ba sira nia kondisaun familia, ho intensaun ajudus ne’e ba duni ema ne’ebe merese.

Depois de halo identifikasaun, nia hateten, grupo selesionadu sira sei tuir formasaun iha Institutu Apoiu Dezenvolvimentu Emprejarial (IADE) kona ba jestaun negosio durante semana ida. 

Entretantu Membru Komisaun F (saude, edukasaun, kultura, veteranus e igualidade jeneru), Deputadu Virgilio da Costa Hornai, hateten numeru trabalhador infantile aas tanba de komprensaun husi inan aman kona ba direitu labarik nian.

“Ita haree labarik sira ne’e maioria idade eskola nian, maibe komu problema ekonomia familia nian, entaun labarik sira sai fali forsa trabalho iha familia,” nia hateten. 

Tanba ne’e, nia sujere ba ministeriu kompetente ou organizasaun sira ne’ebe servisu hodi luta ba direitu labarik nian atu halo kampanha bo’ot ida kona ba hapara trabalho infantile, sensibiliza inan-aman sira no hasa’e konsiensia familia proteje labarik sira.

The Dili Weekly