HASAI PD HUSI GOVERNU, DOM NORBERTO: “LA TAMA IHA HA’U NIA KAKUTAK”

Bispo Diocese Maliana, Dom Norberto Amaral, la kompriende, rajaun fundamentu politiku sira nian, ne’ebe hakarak atu hasai membru Partidu Demokratiku (PD) husi estrutura Governu.

Bispo Norberto kasu lia hirak ne’e wainhira marka prezensa iha aniversariu ba dala XV Partidu Demokratiku ne’ebe halao iha Salaun Canossa, Dili, Sabadu (11/6/2016).

“Ne’e la tama hau nia kakutak tamba hakarak ka lakohi atu konstroe nasaun ne’e hotu hotu nia direitu, dever no obrigasaun. Ne’e laos halo at ba nasaun, ne’e halo diak, se halo diak nusa la fo liman ba malu tamba sa maka tenki ba hasai fali sira,” afirma Dom Norberto.

Dom Norberto Amaral, haklaken katak nudar Bispo hanesan partense ba ema hotu hotu, tenki hatan, se deit maka husu hanesan Bispo prontu.

“Prensensa hau nian iha ne’e tamba konvite husi PD, koalia kleur ona atu hato’o liafuan ida rua ba sira, Bispo ne’e partense ba ema hotu hotu tenki hatan, se deit maka husu aku ada, prezensa ne’e tamba sira konvida hau, tamba sira nia loron aniversariu,” dehan Bispo Norberto.

Bispo Norberto husu ba PD atu kaer metin buat rua deit unidade, kaer metin ba PD nia visaun no misaun atu lori ba nudar partidu nebe mesak joven deit i nudar joven iha ideal nebe as, importante maka metin hodi hasoru difikuldade bar – barak nebe iha rai ne’e.

Nia hatutan, durante kontribusaun husi PD nian diak hanesan dadauk ema hotu hare, sira nebe tur iha Governu ema ezizi dehan atu hasai.

Partidu Demokratiku (PD)  selebra aniversariu ba dala XV hodi halo reflesaun no komunga filosofiu foun ne’ebe hateten, PD ba hotu-hotu no hotu-hotu ba PD.

Serimonia aniversariu ne’e halao iha Salaun Canosiana, Becora, Dili, hodi alerta ba ema hotu-hotu atu sain nain ba PD, liu-liu jerasaun foun ( joventude ho estudantes).

Sekretartiu Jeral PD, Mariano Assanami Sabino sublinha katak, hahuu tinan ne’e ba oin, PD hatuur nudar tradisaun, demokrasia nudar valor nebe maka tenki halo hari Estadu direitu de demokratiku.

Ba militantes PD ne’ebe lahola parte iha anivewrsariu PD ne’e, Assanami husu atu tau konsensia ida katak tenki esforsu para bele fo buat ruma ba PD.

“Ba militantes sira nebe iha fatin fatin, depois La Sama la iha ona, ita hotu tenki iha konsensia ida katak ita hotu esforsu para ita bele fo buat ruma ba PD laos PD maka atu buat ruma ba ita , laos PD atu fasilita ita atu hetan lukru maibe ita hotu tenki fo fali buat ruma ba PD hodi PD bele sai instrumentu estadu nian, servidor povu nian,” afirma Mariano Sabino. nes

Jornal Nacional