KOTA SEI KOLIGA HO PLP

Partidu Klibur Oan Timor Asuain (KOTA) sei halo koligasaun ho Partidu Libertasaun Popular (PLP) hodi bele kompete iha eleisaun 2017.

“Ami iha prosesu de koligasaun no koligasaun entre Partidu KOTA ho PLP.  Ami agora ho partidu PLP halo hela prosesu de negosiasaun, ha’u rasik ba partisipa tiha ona konsolidasaun PLP nian iha Munisipiu Ainaro,”esplika Prezidenti Partidu KOTA, Manuel Tilman ba jornalista, iha nia kna’ar fatin Hotel Beach Garden, Praia dos Coqeuirus, Dili, Sabadu (11/6).

Tuir Prezidenti Partidu KOTA ne’e katak, iha ona konvite atu ba konsolidasaun PLP nian iha fatin seluk maka hanesan Munisipiu Baucau no seluk tan, no ida ne’e estratejia.

Nia hatutan, partidu KOTA nia estratejia ne’e la’os hanesan fali partidu seluk ne’ebe mak halo karavana hakilar tun-sae iha Dili laran no mos Munisipiu sira.

“Ami ninia lojika ne’e dolar hanesan samea, konsensia ho ida seluk naran sei morin hela ne’e mak ho ita bo’ot (Jornalista) rasik nia fo buat ida la’os kampanha,  maibe formasaun i imformasaun konsensia de politika. Ne’ebe atu vota ka la vota ami nia membru sira estavel hela,” tenik Manuel Tilman.

Nia haklaken, la’os atu ba hadau fali foun, foun ne’e joven sira ne’ebe maka tama ba iha tinan 17  atu ba vota ne’e, agora sira uluk ne’e konsiensia iha vota nafatin.

“Ami KOTA nia konsolidasaun hanesan ha’u dehan, Partidu KOTA tuir tradisaun, ha’u kuandu ba Maubise, Same no ba ne’ebe-ne’ebe deit ha’u ho ha’u nia lider sira han hamutuk hodi koalia, ne’ebe ami bok a’an hela no ami la mate to’o eleisaun mak ita haree,”dehan Manuel Tilman.

Tillman dehan katak,  KOTA nia intensaun uluk ne’e la’o hamutuk ho partidu KHUNTO, maibe KHUNTO sira ikus ne’e halo kongresu la konvida tan sira, ne’ebe buat hirak ne’e kestaun seluk ida.

“Partidu Libertasaun Popular (PLP) ha’u rasik ba halo konsolidasaun ho Guntur Vise Prezidenti Interinu, ami koalia ba malu no mos mate restu hanesan konseleiru  ba PLP. Ami sempre hasoru malu bebeik,”haktuir Prezidenti KOTA ne’e.

Nia hatutan, konsolidasaun partidu KOTA ho PLP ne’e la halo buat naran shop. “Shop ne’e dehan katak la presiza hu’u karau dikur, kuandu to iha kampaña eleitoral maka hu’u karau dikur O ba ho karau dikur antes ne’e manulin semo tiha O atu tiru saida.”Tilman kompara.avi

Jornal Nacional