MARI ALKATIRI: RAN FOUN FRETILIN TENKE LUTA PARA VENCER

Sekretariu Jeral (SekJer) Partidu Istoriku Frente Revolucionária do Timor Leste Independente (FRETILIN), Mari Alkatiri husu ba juventude  nudar ran foun partidu  FRETILIN nian, tenke Luta Para Vencer hodi kontinua obra ne’ebe mak iha ona.  Tanba ne’e, obrigasaun lideransa FRETILIN, atu bele transforma Juventude sira hamutuk 60.000 ne’ebé mak ohin loron sai hanesan ran foun hodi kontinua obra ne’ebé mak istoriador partidu no nasaun husik hela ba Timor Leste.

Liu husi delegadu hamutuk 999 husi Munisípiu 12 no Rejiaun Autonomia Espesiál Oe-Cusse ne’ebe mak partisipa iha Konferénsia dahuluk Juventude FRETILIN sai hanesan modelu demokrasia ida ne’ebé mak komesa mostra iha partidu FRETILIN laran.

“Ita nia luta para vencer, ita nia luta para hametin demokrasia, ita luta para hametin paz no ita nia luta para lori dezenvolvementu. Ita dehan a luta continua atu dehan saida, katak kada etapa ita tenke manan, manan ohin, manan aban, manan ba nafatin. E ha’u kontente tanba Juventude FRETILIN ohin loroan barak tebes,  maske dala barak ema dehan partidu FRETILIN ferik no katuas nian deit.  Ohin hatudu momos katak, FRETILIN partidu renovasaun permanente ”Sekretáriu Jerál partidu FRETILIN, Marí Alkatiri hateten iha abertura KonferénsiaNasional Juventude FRETILIN dahukuk ne’ebe hala’o iha Centru Convensoens de Dili (CCD) Domingo (12/06/2016).

Ho prezensa ran foun FRETILIN fó hanoin hikas ba Marí iha tinan 41 liu ba, bainhira nia komlpeta idade 25 anos, fou-foun harí Organijasaun Popular Juventude Timor Leste (OPJT), tanba momentu ne’eba organijasaun refere sai hanesan movimentu juvenil no património iha FRETILIN, no komesa hamosu nia ramu hanesan, OPMT, OPTT, OPJELATIL, Asu’ain Lemorai, Fitun, no seluk tan sai liman ain hodi serve ba povu iha tempu luta, ne’ebé mak to’o ohin loron, tanba ne’e iha mundu demokrásia iha tan Organijasaun Juventude FRETILIN.

Iha tempu independensia, ema hotu liu-liu Juventude FRETILIN luta para venceremos, maske uluk luta ba independensia ho morte para vencer, maibé ohin loron partidu FRETILIN hamutuk ho ran foun sira lutar para vencer.

Ho ida ne’e sai hanesan dejafiu ba FRETILIN, iha luta naruk FRETILIN hamutuk ho povu manan ona independensia no lori ona demokrasia. No durante tinan 10, FRETILIN lori ona paz ba nasaun Timor Leste. Tanba ne’e ho tempu ne’ebé mak iha, tenke avansa hodi manan iha kada etapa tuir razaun ne’ebé mak partidu FRETILIN ohin loron ka’er metin iha neon no vontande, hodi lori luta ba oin.

Maske ohin loron, lideransa barak la hamutuk ho FRETILIN, maibé FRETILIN nafatin ho sira iha sira nia neon no laran, nune’e ohin loron ema hotu haree katak, komesa hamutuk fali hodi lori dezenvolvementu ba povu no nasaun ida ne’e.

Entaun liu husi dalan ida ne’e, delegadu sira hamutuk hodi hili, responsavel Juventude FRETILIN ne’ebé mak bele lidera joven sira hotu para tun ba baze halo servisu, nune’e FRETILIN bele manan hikas fali iha eleisaun 2017 mai.

Husi delegadu ne’ebé mak hetan konfiansa, nia mak sei sai hanesan membru Central FRETILIN (CCF) nian, hodi lori polítika tun no transformasaun ba Timor Leste nia sosiedade.

“Ne’e duni, juventude signifika tenke jenerodade, katak tenke entrega a’an tomak ba kauza povu nian no kauza ida sagradu tebes,”afirma Alkatiri.

FRETILIN la muda nia prinsipiu no valores, FRETILIN sei la muda nia polítika no programa hodi liberta povu, tanba povu ita seidauk liberta.

Tanba, bainhira la konsege ne’e tanba la mobiliza povu atu partisipa iha prosesu libertasaun povu, la’os membru governu no deputadu mak tun  halo manutensaun ba Estrada ka dezenvolvementu, povu mak tenke tun, maibé povu tenke hatene katak, dezenvolvementu refere hola parte hodi fó benefisiu ba ninia a’an rasik.

Ho nune’e sekjer FRETILIN ne’e husu ba Juventude FRETILIN atu komesa haforsa liu tan prinsipiu no valores partidu FRETILIN nian ne’ebe mak uluk tun hodi servisu hamutuk ho povu.

Marí Alkatiri husu ba juventude FRETILIN ne’ebe mak enkuadra a’an ona iha partidu Istóriku ne’e atu prepara a’an, tanba obrigasaun joven sira uluk agora sai hanesan lideransa atu transfere esperiensia polítika ba juventude ohin loron nian.

Alkatiri hakfodak tanba, uluk FRETILIN hahú la barak hanesan juventude 60.000 ne’ebé mak ohin loron enkuadra ho partidu bo’ot ne’e.

Maske nune’e husu ba Juventude tenke akompanha didiak fenómeno polítika ne’ebé mak ohin loron akontese iha Timor Leste, husi tinan 2007, 2012 to’o ohin loron nian, tanba FRETILIN hala’o husi prosesu ida Marsa ba paz to’o iha marsa ba Vitória, husi vitória ne’e mak tenke ka’er metin nafatin.

Tan ne’e FRETILIN ohin ba oin, hahú ho nia polítika katak, prepara juventude sira atu nune’e bele komesa sente ona konaba dinámika iha polítika ne’ebé mak atu komesa la’o iha FRETILIN nia laran.

Maibe, Alkatiri husu ba juventude FRETILIN, atu komesa servisu maka’as iha baze, hodi define kedas FRETILIN nia vitória.

Tanba, Juventude mak sai hanesan futuru lideransa partidu FRETILIN nian iha futuru, maibé lideransa la’ós deit husi Prezidente no Sekretáriu Jeral, importante mak sai hanesan Comite Central.

Iha oportunidade ida ne’e, Alkatiri husu ba juventude atu aproveita tempu hosi halais tranzisaun, nune’e hatudu ba mundu tomak katak, FRETILIN hahú husi organijasaun polítika Seklu 20, sai fila-fali ba partidu politika modernu ho preukupasaun sosiais no ekonímiku iha seklu 21. Viva FRETILIN, Viva Juventude FRETILIN, Juventude FRETILIN, ‘Lutar Para Vencer’. (***)

Jornal Nacional