"Konferénsia
dahuluk hosi komunidade portugés aziátiku sira" hahú iha loron-tersa iha
Malaka hodi tenta sensibiliza nasaun luzófonu sira, liuliu Portugal, ba ameasa
estinsaun ne'ebé komunidade sira hasoru hodi mantén trasu no identidade
herdeiru sira hosi kultura portugés.
"Hanesan
inísiu hosi kapítulu foun ida ba portugés aziátiku sira", hatete ba Lusa
iha loron-segunda ne'e hosi Joseph Sta Maria ne'ebé prezidi konferénsia
bainhira prepara detalle ikus sira ba enkontru.
Joseph
Sta Maria hein katak ema atus resin rona konferensista sira ne'ebé konvidadu
iha “Casa D’Albuquerque”, naran hosi sala hotel hosi bairu portugés Malaka nian
ne'ebé sei simu konferénsia no evoka naran hosi Afonso de Albuquerque, ne'ebé
iha tinan 1511 konkista sidade ne'e.
Naran
no referénsia portugés sira bele haree iha bairu ne'ebé, iha “portuguese
square”, to'o tasi-ibun, restaurante sira iha naran hanesan “lisbon” ka “Mello”
oferese "hahán portugés sira" no iha fatin hotu-hotu haree bandeira
nasional matak no mean.
Iha
“portuguese stellement” (bairu portugés) moris komunidade katóliku ida,
"portugés sira hosi Malaka" ne'ebé festeja Natal no santu populár
sira no ko'alia lian kriolu ida ne'ebé kahur lian portugés antigu ho lian
malaiu.
La'ós
hanesan komunidade úniku ida hanesan ne'e iha Ázia no kultura sira ne'e maka
organizadór sira hosi konferénsia ne'e hatete katak tenki hetan tulun urjente.
Objetivu maka halibur kbiit sira hodi bele prezerva no halo to'o mensajen ba
nasaun sira ne'ebé ko'alia lian portugés, liuliu Portugal.
"Portugal
iha responsabilidade moral relasionadu ho "nia oan sira" iha Ázia
tomak", herdeiru sira hosi espansaun marítimu portugés hosi sékulu XVI no
XVII, maski la'ós hanesan sidadaun portugés, konsidera hosi Joseph Sta Maria ne'ebé
hanesan reprezentante hosi minoria sira iha administrasaun Malaka nian.
"Portugal
agora tenki kaer knaar ne'ebé kompete ba nia no konvense CPLP no nasaun
luzófonu riku sira hodi salva komunidade luzu-aziátiku sira hodi labele lakon.
(...) Ami hein katak bele loke líder portugés sira nia fuan no sira bele haree
ameasa ba identidade portugés nian iha Ázia hanesan real", nia hatutan.
Iha
Malaka, tuir konviti hosi organizasaun konferénsia nian, iha ona prezensa hosi
líder istóriku hosi rezisténsia timoroan nian, eis-Prezidente no
eis-primeiru-ministru no atuál ministru Timor-Leste nian, Xanana Gusmão,
embaixadór sira hosi Portugal iha Tailándia no iha Indonézia no prezidente hosi
Asisténsia Médiku Internasional (AMI), Fernando Nobre. Delegasaun hosi Asembleia
Repúblika portugés nian ne'ebé hein atu marka prezensa la halo viajen ba
Malázia.
Joseph
Sta Maria lamenta katak polítiku portugés sira labele hetan reprezentasaun
maibé nia garanti katak senti "haksolok tebes" ho prezensa sira
ne'ebé konfirmadu.
"Sira
ne'ebé maka la mai sei falla buat ne'ebé istóriku no sei arepende tanba la
marka prezensa. Ha'u hatene katak iha konstranjimentu iha tempu maibé falla
buat ne'ebé fantástiku", nia hatete.
Maski
nune'e, nia senti konviktu katak mensajen ne'e sei to'o Portugal.
Reprezentante
sira hosi komunidade sira hosi nasaun sanulu resin sei marka prezensa iha
Malaka ba konferénsia loron rua: Malázia, Singapura, Indonézia, Sri Lanka,
Austrália, Tailándia, Birmánia, Timor-Leste, Xina ho Índia.
Iha
kazu balun, komitiva sira inklui grupu muzikal sira ho inpirasaun portugés nian
no sai hanesan ezemplu loloos hosi manifestasaun kultural sira hosi komunidade
luzu-aziátiku sira.
Entre
konferensista sira iha akadémiku oioin hosi universidade sira Estadus Unidus
nian, Indonézia, Áustria, Sri Lanka, Filipina, Malázia ho Austrália, ho
investigasaun sira relasionadu ho heransa kultura portugés nian iha fatin oioin
iha mundu.
SAPO
TL ho Lusa
Sem comentários:
Enviar um comentário