Dezembru, PD Halo Kongresu Nasionál

DILI, (ANTIL) - Prezidenti Partidu Demokrátiku (PD), Adriano do Nascimento hateten,  PD sei hala’o kongresu nasionál iha Dezembru tinan ne’e.

“Ami hein katak, iha fulan ida ne’e ami nia preparasaun di’ak ona. Oras ne’e,  ami tama ona iha konferénsia postu administrativu, depois mai iha kongresu munisípiu, hafoin halo kongresu nasionál,” Adriano dehan ba jornalista sira iha Palásiu Prezidénsia Repúblika, Bairu-Pité, Dili, Kinta (25/8), hafoin remata inkontru ho Xefe Estadu Taur Matan Ruak.

Iha kongresu nasionál ne’e, sei hili Prezidenti partidu hodi lidera iha futuru. ” Militante sira maka iha direitu atu kandidata sé  maka bele lidera partidu,” nia dehan.

Kanidatu ba líder partidu, tuir eis Vise Prezidente Parlamentu Nasionál tenki nakloke ba ema seluk, labele líder ida de’it maka ukun to’o hotu.

Liberdade ba ema atu kandata lider ba partidu, hanesan parte ida husi edukasaun. ” Husik sira ne’ebé iha kapasidade maka bele hakat ba. Importante maka PD nafatin,” nia dehan.

Kona-ba iha potensia militante sira kandidata fali Adriano ba Prezidente Partidu, nia dehan, ”  Lakohi loko án katak ha’u maka iha kapasidade liu sira seluk. Buat ida ne’e, militante maka tenki hateten katak  ha’u bele ou la labele.”

Maske nune’e, nia hatutan, bainhira kongrejista sira hakarak hili atu lidera partidu, sempre prontu. Se maioria lakohi ona, Adrinao prontu tún.

Kona-ba sorumutu ho Prezidenti Repúblika Taur Matan Ruak, Adriano informa, laiha diskusaun kona-ba partidu, maibé ko’alia kona-ba mudansa estrutura meza iha Parlamentu Nasionál.

“Ha’u mai hanesan deputadu hodi hato’o ba Prezidenti Repúblika katak ha’u tún ona hosi kargu Vise Prezidenti Parlamentu Nasionál tanba kestaun konfiansa polítika,” nia haktuir. (Jornalista: Xisto Freitas)

Foto: Adriano do Nascimento ko´alia ba jornalista sira ne´ebé hala´o kobertura iha Palásiu Prezidénsia Repúblika. Foto ANTIL/Xisto Freitas