Rádiu Komunidade Hetan Formasaun Dezastre Naturais

DILI, (ANTIL) – Rádiu Komunidade hosi munisípiu 13 simu formasaun kona-ba dezastre naturais hosi International Organization for Migration (IOM).

”Objetivu hosi formasaun ne’e fó prioridade no koñesimentu oinsá mak bele fó sai informasaun no oinsá atu alerta no antisipa dezastre ruma ne’ebé mak akontese iha komunidade nia le’et”, Kordenadór Programa Redusaun Risku Dezastre, Lúis Pedro Pinto ba ANTIL iha JL Villa Fatuhada, Kinta, (25/8).

Liu-hosi formasaun, jornalista sira hosi radiu komunidade bele halo sensibilizasaun ba komunidade sira. Formasaun ne’e oinsá sira bele hetan koñesimentu, oinsá dezeñu ba informasaun hodi hato’o ba komunidade kona-ba redusaun risku dezastre naturais. Nune’e mos, saida mak komunidade sira bele halo antes no depois dezastre akontese.

Seluk mak oinsá partisipante sira bele hatene no dezenvolve prosedur standar kona-ba dezastre emerjénsia, para sira bele halo asaun ruma ne’ebé ho lalais. Hosi pontu de vista ba radiu oinsá atu hato’o mensajen ba komunidade ho lalais, nune’e sira bele hases-án hosi dezastre. Formasaun ne’e hetan partisipasaun masimu hosi radiu komunidade sira iha munisípiu 13.

Formadór prinsipál mai hosi Bali, Indonézia,  fasilita hosi Cruz Vermelha Timor-Leste (CVTL), Meteorolojia no Komisaun Dezastre Naturais. Programa ne’e organiza hosi IOM no hetan suporta orsamentu hosi USAID liu-hosi departamentu The Office of U.S. Foreign Disaster Assistance (OFDA) ne’ebé suporta hosi 2012.

Totál orsamentu kuaze milaun lima, hahú faze dahuluk to’o datoluk. Programa hahú hosi 2012, 2013, 2014 no kontinua 2016 no programa ne’e sei kontinua to’o 2017.

Programa formasaun ne’e halo ona iha munisípiu Bobonaru, Ermera, Manatutu, Baucau, Viqueque, Kovalima no Manufahi. Maibé, ba programa avizu antisipada, dezenvolve standar prosedur. (jornalista: Zezito da Silva; editora: Rita Almeida)

Foto: Formadór halo hela aprejentasaun ba jornalista radiu komunidade sira iha JL Villa Fatuhada, Kinta, (25/8). Foto ANTIL/Zezito da Silva