Reforma Fiskál 2016

Introdusaun

Durante 2016, Governu Timor-Leste kria Komisaun Reforma Fiskál ida (KRF), ne’ebé lidera hosi eis deputada Fernanda Borges, atu hakerek fali Timor-Leste lei sira taxa nian ho objetivu atu hadi’ak konformidade no kreximentu reseita nian. KRF ne’e foka ba reforma lei no prosedimentu aduaneiru nian, no estabelese Impostu ba Valor Akresentadu, no kria pájina web ida iha website Ministériu Finansa ho komunikadu imprensa no ezbosu lei sira.

Iha 5 Agostu, Komisaun publika sai anúnsiu ida iha nia pájina web katak komisaun ne’e “prontu ona hodi halo konsultas hodi simu komentáriu husi setór privadu sira,” ne’ebé tenke hatama ho prazu to loron 15 Agostu. KRF publika ezbosu sira kona-ba Lei IVA (Portugés no Ingles) no kódigu prosedimentu aduaneiru nian, no alterasaun ba Kódigu Prosedimentu Tributaria nian iha Portugés.

Submisaun

La’o Hamutuk la fó tempu barak ba asuntu ida ne’e, no ami la’ós peritu kona-ba impostu nian, maibé buat barak ne’ebé ami previa tiha ona hosi reforma fiskál ne’ebé sala dalan iha 2008 sai tiha realidade. Maske nune’e, ami hare katak KRF no Governu preokupa liu ho investidór rai li’ur no esportador sira duke maioria povu Timor-Leste ne’ebé sei kiak, no sira kontinua falla atu halo esforsu sira ne’ebé sériu atu sai hosi dependénsia ba esportasaun petróleu, tanba ne’e ami hanoin katak ami tenke halo komentáriu ruma. Ami hakerek submisaun ida kona-ba proposta lei Impostu ba Valor Akresentadu (IVA) iha loron 15 Agostu, hodi fó atensaun maka’as ba asuntu sira tuir mai ne’e:

Timor-Leste tenke investe uluk molok kolleita, tanba iha ema uitoan de’it mak iha osan nato’on atu selu taxa boot no ita nia ekonomia ohin loron ne’e la sustentável.

Lei IVA ida ne’e seidauk promove justisa ekonomia, tanba ema kiak sira sei selu taxa ne’ebé hanesan ho ema riku sira. Ema riku sira no emprezariu ne’ebé iha osan barak tenke selu barak.

Lei tenke ajuda kompetisaun produtu lokál ho sasán importasaun. Partikulármente, ita nia setór agrikultura presiza protesaun.

Lei labele taka oportunidade ba ema kiak sira atu hadi’ak sira nia moris ka lei labele tau todan ida ne’ebé la tama ulun ba negosiante ki’ik sira.

Lei tenke halo klaru ba konseitu sira hanesan fronteira maritima, atividade petróleu iha tasi laran, tranzasaun la’ós ho osan tahan, vendedór sira iha merkadu no negósiu sira ne’ebé ki’ik tebes, akordu merkadu livre, viajen internasionál no mós area sira seluk.

Fornesedór ba servisu edukasaun no saúde tenke hetan insensaun hosi IVA.

Mudansa nivel impostu nian tenke presiza asaun Parlamentár ida ne’ebé espesífiku.

Dokumentu (bele Tetum ka Portugés)

Esboso Lei do Imposto Sobre o Valor Acrescentado (Port), 27 Jul 2016

Esboso Codigo de Procedimentos Aduaneiros (Port), 2 Ago 2016
Revista ba CPA

Proposed Amended Taxes and Duties Act (Port.), Jul 2016

Analiza no komentáriu

La'o Hamutuk nia submisaun ba Komisaun Reforma Fiskál kona ba Ezbosu Lei Impostu ba Valor Akresentadu (IVA), 15 Agostu 2016

Reforma Fiskál bá Timor Leste, nota informativa husi UN Women, Mar 2016

La’o Hamutuk