quinta-feira, 8 de setembro de 2016

Amu Belo Sei Dirije Misa Ba Traballadór Korea


DILI, (ANTIL) – Eis Bispu Administradór Apostóliku Dioseze Dili, Don Carlos Filipe Ximenes Belo, SDB, sei dirije misa ba traballadór timoroan sira ne’ebé oras ne’e serbisu iha Korea.

Amu Belo sei selebra misa abertura iha loron 14 Setembru no misa enseramentu iha loron 15 kalan.

“Traballadór sira hamutuk ho Sekretaria Estadu Polítika Formasaun Profisionál no Empregu (SEPFOPE) maka foti inisiativa ida ne’e atu Amu Belo bele selebra misa ida ba traballadór durante feriadu Cheusok nian iha Korea,” Adidu Traballadór Korea, Maurício Borges ba ANTIL via email, Kuarta (7/9).

Cheusok ne’e maka oportunidade ba timoroan sira atu bele hetan férias hosi patraun no bele hasoru malu no selebra loron AMICUS nian. Selebrasaun ida ne’e halo tinan-tinan.

Tinan ida ne’e, Maurício informa, seremónia Cheusok no festa AMICUS nian selebra iha Gwangju Metropolitan City. Amu Belo sei to’o iha Korea iha 12 Setembru. SEPFOPE maka sei fasilita Amu Belo nia viajen ida ne’e, inklui Serbisu Adidu nian iha Korea, no mós Embaixada Timor-Leste iha Korea.

Razaun fundamentál konvida Amu Belo, nia esplika, tanba traballadór sira saudades Amu Belo no sira haree katak iha tinan kotuk timoroan sira iha Reinu Unidu konvida Amu Belo. Entaun, sira mós foti inisiativa hodi konvida Amu Belo liuhusi SEPFOPE.

Razaun ida seluk, Adidu afirma, liuhusi okaziaun ida ne’e sai oportunidade di’ak ba Amu Belo atu hasoru malu fali ho ninia belun ativista Koreanu ida ho naran Jang Hyun Yun ne’ebe uluk fó apoiu ba Timor-Leste nia luta, inklui mós halo esforsu hodi rekolla asinatura ba petisaun atu fó apoiu ba Amu Belo no Ramos Horta atu hetan Nobel da Páz.

Ativista Koreanu refere oras ne’e daudaun asumi kargu nu’udar Maior ba Sidade Gwangju. Maior Jang Hyun Yun uluk vizita Timor-Leste iha 1996 nu’udar dotor ka mediku ida no mós nu’udar ativista.

“Figura rua ne’e hasoru malu hikas fali hafoin ikus liu sira hasoru malu iha Timor-Leste iha 1996,” Maurício esklarese.

Nia dehan traballadór sira ne’ebé sei partisipa iha seremónia ida ne’e kalkuladu na’in 600 to’o 700. Hafoin ramata misa, Amu Belo sei sai hosi Korea iha loron 16 hodi ba liu Bali, Indonézia.(jornalista: Xisto Freitas; editora: Rita Almeida)

Sem comentários: