Federasaun Basketból Sei Hala’o Liga Nasionál Basketból

DILI, (ANTIL) – Federasaun Basketbol sei hala’o Liga Nasionál Basketból dahuluk iha Novembru tinan ida ne’e. Oras ne’e, inskrisaun ba klubu sira hahú ona iha 29 Agustu to’o 16 Setembru 2016.

“Ami planeia tiha ona katak iha Novembru bele halo lansamentu ba liga ne’e tanba, ami reuni tiha ona ho klubu 8 ne’ebé maka partisipa iha ami nia inkontru inisiál hodi fó ba sira kritériu oinsá maka bele sai membru asosiadu Liga nian”, Sekretáriu Jerál Federasaun Basketból, Igildo Tilman ba ANTIL iha nia kna’ar fatin, Jináziu Dili, Kinta (8/9). “Klubu balun mai rejista ona no lubuk ida maka seidauk rejistu”.

Objetivu hosi Liga Nasionál Basketból, Tilman esplika, hanesan meius ida atu akomoda talentu foinsa’e sira iha nasaun ida ne’e ne’ebé joga basket.

Objetivu seluk, oinsá maka liuhusi meius ida ne’e bele dezenvolve basketból no liuhusi meius ida ne’e mós hakarak buka fini ba ekipa nasionál ne’ebé bele reprezenta Timor-Leste ba futuru.

Nia hatutan sira kria ona Komisaun Instaladora ida atu bele instala Liga ne’e. “Kombinasaun ba atividade sira ne’e liuhusi Assembleia Jerál, molok ba Assembleia Jerál, preparativus ne’ebé ami halo maka hamosu kritériu ba klubu sira oinsá maka prepara ezbosu estatutu Liga nian”, nia esklarese.

Igildo informa sira sei konvida klubu 21 ne’ebé maka eziste atu partisipa iha Liga Nasionál Basketból refere.

Orsamentu ba Liga sei apoiu hosi Sekretaria Estadu Juventude no Desportu (SEJD) ho montante Dolar Amerikanu 200,000. (jornalista: Xisto Freitas; editora: Rita Almeida)

Foto: Igildo Tilman