Conselho
Imprensa Timor-Leste (CI), Segunda (29/8/2016), iha Jakarta-Indonesia,
estabelese akordu kooperasaun ho Dewan Pers Indonesia (DPI) hodi tulun
malu iha aspeitu kapasitasaun institusional no dezenvolvimentu politika
imprensa nian.
Husi
loron 29 Agostu to’o loron 2 Setembru 2016, CI Timor-Leste halao primeira
vizita traballu ba Jakarta-Indonesia, hodi halo estudu komparativu no
estabelese kooperasaun ho Dewan Pers Indonesia (DPI).
Durante
estadia iha Jakarta, CI mos halo enkontru no diskusaun ho Lembaga Pers Dr.
Soetomo (LPDS), Komisi Penyiaran Indonensia (KPI), Aliansi Jurnalis
Independen (AJI) no mos hasoru malu (bersilaturahmi) ho Ministro
Komunikasaun no Informatika Indonesia nian (KOMINFO), Rudiantara.
Delegasaun
CI Timor-Leste, kompostu husi Prezidenti CI, Virgilio da Silva Guterres,
no membru nain-hat hanesan, komisariu Jose Ximenes, komisariu Hugo Fernandes,
komisariu Paulo Araujo no komisariu Francisco Belo Simões da Costa. Hola parte
mos iha delegasaun ne’e Diretora Ezektiva, Ana Teresa Sequeira ho Assessor
Planeamentu no Programa Rigoberto Monteiro.
Iha
sorumutu ho DPI halo mos diskusaun konaba modalidade ba koperasaun entre CI
Timor-Leste no DPI. Iha okaziaun ne’e, Ketua Dewan Pers Indonesia, Yoseph Adi
Prasetyo (Stanley) no membru DPI Indonesia nian hanesan, Nezar Patria,
Ahmad Jauhar no Ratna Komala. Hafoin diskusaun entre instituisaun rua
ne’e, iha kedas loron ne’e, CI Timor-Leste no DPI hamosu konkordansia
institusional hodi tulun malu iha aspeitu kapasitasaun institusional no dezenvolvimentu
politika imprensa nian liu husi asina Memorandum of Understanding (MoU)
eh Nota de Intendementu (NdI) entre CI Timor-Leste ho Dewan Pers Indonesia ba
periodu tinan lima mai.
Aspetu
sira ne’ebe mak CI Timor-Leste no DPI sei elabora liu tan husi NdI mak konaba
kapasitasaun institusional, peskiza, kapasitasaun no mos dezenvolve
enkuardamentu politika, lejislasaun no regulamentu sira nudar enkuadramentu
institusional ba implementasaun mandatu no kompetensia CI Timor-Leste.
Iha
nia intervensaun wainhira asina NdI ne’e, Presidenti CI Timor-Leste, Virgilio
da Silva Guterres hatete katak soumutu ho DPI ne’e produtivu tebes no hanesan
esperensia osan mean ida atu dezenvolve CI Timor-Leste.
Stanley
iha nia intervensaun hatete katak koperasaun entre DPI no CI Timor-Leste atu
hametin liu-tan lasu amizade ne’ebe kesi tiha ona durante periodu ne’ebe luta
ba demokratizasaun iha Indonesia no independensia Timor-Leste nian durante
periode rezime Orde Baru. Liu husi konkordansia ne’e mos instituisaun rua ne’e
aseita atu mos halo kontribuisaun ba rekomendasaun sira husi Komisaun Verdade
no Amizade (CVA) ne’ebe mak to’o agora seidauk iha mudansa signifikativu hodi
kura kanek sira ne’ebe iha liu husi servisu jornalismu nian hodi kontribui ba
hametin paz no harmonia entre povu nasaun rua liu-liu hirak ne’ebe moris besik
malu iha areia frontiera terestres Indonesia no Timor-Leste. Iha mos enkontru
ne’e CI Timor-Leste no DPI lansa inisiativa hodi estabelese Konsellu
Inprensa regional nian ba membru Estadu sira ne’ebe mak halibura a’an iha
ASEAN.
Husi
loron 30 Agostu to’o 1 Setembru, delegasaun CI Timor-Leste nian mos halo
diskusaun ho lideransa sira husi Lembaga Pers Dr. Soetomo
(LPDS), Jakarta, ne’ebe lidera husi Priambodo, nudar Direitor Exekutivu
LPDS nian hodi hahu diskusaun konaba kapasitasaun ba jornalista Timor-Leste
nian, liu-liu iha aspeitu sertifikasaun ba jornalista sira.
Iha
loron ne’e mos CI Timor-Leste halo enkontru ho Komisi Penyiaran Indonesia (KPI)
ne’ebe lidera husi Vice Presidenti KPI, Sudjarwanto Rahmat Muh
Arifin, hodi halo diskusaun konaba posibilidade koperasaun iha
futuru iha aspeitu lejislasaun no monitorizasaun ba imprensa sira hanesan
televizaun no radio sira.
Hafoin
iha 31 Agostu, delegasaun CI Timor-Leste halo mos diskusaun amigavel ho Aliansi
Jurnalis Independen (AJI) hodi sharing informasaun ba malu kona-ba lalaok
liberdade imprensa no liberdade esperasaun iha nasaun ida-idak nian, komitmentu
advokasia ba aktividades jornalismu nian ho mos lalaok organizasaun jornalista
sira nian iha Timor Leste. Prezidenti AJI, Suwarjono, ho nia Sekretariu Jeral,
Arfi Bambani Amri, inklui membru AJI sira seluk.
Iha
diskusaun ne’e mos CI Timor-Leste no AJI koalia konaba posibilidade koperasaun
entre membru sira organizasaun jornalista nian iha Timor Leste ho Indonesia.
Iha
loron 31 Agostu, delegasaun CI Timor-Leste nian mos halo vizita kortezia ba
Ministeriu Komunikasaun no Informatika (KOMINFO) Indonesia nian hodi hasoru
malu ho Ministru KOMINFO, Rudiantara. Sorumutu, atu explora posibilidade
koperasaun entre CI Timor-Leste no KOMINFO iha seitor lejislasaun ba seitor
imprensa sira online nian.
“Lori
Governu Indonesia nia naran hau hato’o bemvindo ba delegasaun CI Timor Leste
iha Jakarta, hein katak, lasu amizade ne’ebe CI Timor Leste halo ona ho Dewan Pers
Indonesia, Lembaga Pers Doktor Soetomo, Komisi Penyeiaran Indoneisa no AJI bele
hametin liu tan iha futuru atu hamutuk dezenvolve komunikasaun social entre rai
rua ne’e,” hateten Ministru Rudiantara.
Presidenti
CI Timor-Leste hatoo ba Ministru Rudiantara katak vizita delegasaun CI
Timor-Leste nian mai Jakarta ne’e atinji duni nia objetivu tan konsege halo ona
Nota de Intendementu ho Dewan Pers Indonesia no mos hahu diskusaun ho
instituisaun sira seluk.
Presidenti
CI agradese ba Ministru KOMINFO ba nia koperasaun diak ho instituisaun sira
hanesan DPI no KPI ne’ebe fasilita enkontru no diskusaun sira durante estadia
iha Jakarta.
Iha
loron 1 Setembru, delegasaun CI Timor-Leste nian partisipa iha seremonia
entrega Kartaun Imprensa no Sertifikadu ba Jornalista Senior Indonesia nian
ne’ebe DPI fo ba membru nain 14. Iha seremonia ne’e delegasaun CI Timor-Leste
mos partisipa iha diskusaun konaba prosesu sertifikasaun ba jornalista sira no
etika jornalismu nian. Orador ida husi diskusaun ne’e mak eis Presidente DPI,
Prof Dr. Bagir Manan, ne’ebe iha loron ne’e mos simu kartaun Jurnalis Utama
husi DPI.
Antes
fila mai Dili, Presidenti CI Timor-Leste oferese jantar konfraternizasaun ho
liderasan no membru sira husi DPI, LPDS, KPI, AJI no jornalista no ativista
Indonesia sira ne’ebe durante ne’e fo solidaridade ba luta ba ukun a’an
Timor-Leste nian. Iha okaziaun ne’e partisipa mos Embaixador Timor Leste ba
Indonesia, Alberto Xavier Pereira Carlos.sel
Jornal
Nacional
Sem comentários:
Enviar um comentário