OSAN BELE SOSA JUSTISA…?!

Jornal Nacional, editorial

Ikus – ikus nee publiku akompanha prosesu julgamentu iha Tribunal Distritu Dili no Tribunal Rekursu ba kazu hotu- hotu, li-liu kazu korupsaun nebe komete husi membru governu sira no kazu droga.

Kazu Korupsaun no kazu droga nian publiku intrese tuir prosesu sira nee tamba kazu rua nee,  korupsaun nee naok osan povu nian, involve governante sira nebe impede prosesu desenvolvimentu país nian no kazu droga nee mos importante tamba estraga joven jerasaun nasaun nee ninia vida.

Maske senti furak akompanha prosesu julgamentu ba kazu korupsaun no droga nebe involve ema boot, membru governu maibe publiku mos lalakon uportunidade hodi akompanha mos prosesu julgamentu kazu sira seluk, krime normal, violensai domestika no asidentetrafiku nebe lao iha tribunal.

Kazu nebe sai atensaun publiku iha semana rua ikus nee mak kazu krime, asidente trafiku iha Metiaut resulta ema nain rua mate no asindente trafiku nee involve ukun nain sira nia oan, ukun nain sira nia familia.

Agora kestaun saida mak uniku iha prosesu julgamentu kazu asidente trafiku nee? klaru asidente nee involve familia boot sira,  boot sira nia oan rasik no ema nebe bele dehan iha osan “ riku”.

Tamba asidente trafiku nee familia autor lori osan 20.000 Dollar Amerika ba familia vitima nebe ikus mai tribunal deside tinan rua kadeia nebe juis sira troka tinan 2 kadeia ba suspende ba tinan 3.

Desizaun Tribunal nian suspende deit autor krime nee signifika desizaun tribunal nian baseia ona ba osan nebe familia autor fo ba familia vitima, tan nee bele dehan autor asidente trafiku nee livre kondisional.

Desizaun tribunal nian ba kazu asidente trafiku iha Metiaut nee hatudu prezedente ida nebe ladun diak iha sistema judisiariu Timor Leste nian tamba publiku komesa kestiona katak boot sira ka familia boot nian ka ema riku sira halo krime la presiza tama kadeia, fo osan ba familia vitima, problema taka.

Hakarak ka lakohi, mosu ona espetativa iha publiku katak osan bele sosa ona justisa. Se deit halo krime, iha osan mak sei latama komarka, fo deit osan ba vitima, selesai. Karik tribunal sira kontinua aplika maneira sira hanesan nee sei hafaku sistema judisial iha rai laran, ema sei la respeita lei nebe vigora.

“Publiku labele komesa halo konkluzaun katak familia autor asidente Metiaut fo osan nune’e labele halo ona keixa, tanba kazu ne’e seidauk iha faktus kompletu. Kazu ne’e sei prosesa, tanba iha ona mate, e violenta tenki halo otopsia depois polisia sei investiga, depois haruka prosesu ka arkivu prosesu ne’e depende ba prova, ita labele komesa koalia dehan ou tanba ema bo’ot mak soke prontu selu deit labele hanesan ne’e, dala ruma ema ne’ebe soke  mos trauma hela, tanba ema mate iha sira nia oin sira la halo buat ida  ba ema ne’ebe mate,” Ana Pessoa.

Los duni, senhora, asidente trafiku nee tenki iha parte ida sala no iha los, bele vitima sala maibe asidente nee resulta ona ema mate, laharee ona sala ka los maibe kestaun mak ema mate, tan nee obrigatoriamente autor kulpado.

Agora desizaun tribunal nian maske vitima sala mos atuor tenki tama kadeia tamba iha ona ema mate. Maibe iha kazu nee autor libre tamba fo osan ba familia vitima, nee hatudu ona ba publiku katak justisa bele negosia ona ho osan.*