Polísia 23 sei tuir Formasaun Detekta Terorismu-Droga

DILI, (ANTIL) – Atu hatan ba nesesidade Seksaun Anti Terorismu (SAT), Komandu Polísia Nasionál Timor-Leste (PNTL) sei haruka unidade Espesiál Polísia nain 23 desloka ba Portugal durante fulan rua hodi tuir formasaun kona-ba detekta droga no terorismu.

“Semana balun mai pesoál nain 23 sei desloka ba Portugal durante fulan rua hodi tuir formasaun no bainhira sira fila no iha koñesementu maka ita sei haree pasu tuir mai, aliende komesa ona halo kompras ba ekipamentu kona-ba detekta droga no terorismu”, Segundu Komandante Jerál PNTL, Komisariu Faustino da Costa ba jornalista sira iha nia servisu fatin foin lalais ne’e.

Komandu PNTL presiza infraestrutura baziku no orsamentu hodi kria Cinoteknika (anjing pelacak) hodi detekta droga ne’ebé maka oras ne’e dadaun akontese no trafikante sira uza Timor-Leste hanesan fatin tranzasaun droga.

Maibé atu treinu asu hodi detekta droga ne’e presiza tempu no infrastrutura baziku hanesan uma, toba fatin no hahan ba asu ne’e signifika presiza orsamentu.

Estabelese Cinoteknika presiza tratamentu espesiál ba asu tanba, ne’e tenke iha pessaol ne’ebé maka treinadu no sai treinadór, nune’e PNTL hein hela no ko’alia ona ho Ministru Interior, Longuinhos Monteiro.

Atu sosa asu mos tenke identifika nasaun ne’ebé maka nia klima hanesan ho Timor tanba ne’e, presiza infrastrutura baziku no orsamentu hodi halo preparasaun ida antes hola asu hodi halo servisu tanba, atu treinu asu tenke uza materiál ne’ebé maka hanesan hodi detekta. (jornalista: Manuel Pinto; editora: Rita Almeida)

Foto 1: espesial – Foto 2: Segundu Komandante Jerál PNTL, Komisariu Faustino da Costa.