Ensino Superior Preokupa Ho Kualidade No Sustentabilidade

DILI: Reitór Dili Institute of Technology (DIT), Manuel Vong hateten Ensino Superior preokupa tebes ho kualidade no sustentabilidade iha prosesu aprendizajen.

Manuel Vong hatete lia hirak ne'e ba jornalista hafoin remata enkontru ho Primeiru Ministru no Ministeiro Edukasaun iha Ministériu Edukasaun, Vila-Verde, Dili, Kinta (17/11).

"Kualidade no sustentavel sai preokupasaun ba ami. Tanba ida ne'e hanesan primeira ves ami halo enkontru atu oinsa hametin parseria entre ensino superior ho governu," dehan Vong.

Tuir Vong, enkontru ne'e mós ko'alia kona-ba fundus orsamentu ba estudante. “Estudante nu'udar gerasaun presiza fundus ne'ebé di'ak hodi ajuda sira iha prosesu estudu," Vong tenik.

Reitór DIT ne'e mós dehan, iha Timor-Leste agora iha hamutuk universidade sanulu resin ida (11). Ida mak universidade governu nian, 10 privadu. Hosi númeru ne'e, total estudantes hamutuk ema na'in 45.000 ho dosente hamutuk ema na'in 1.500. (*)

Frei Belo - Editór: Alexandre Assis – Ola Timor