quinta-feira, 26 de janeiro de 2017

Kobertura Eleisaun Tenki Igual

DILI (ANTIL) - Sekretáriu Estadu Komunikasaun Sosial, Nelio Isaac Sarmento husu ba instituisaun mídia nasionál tantu empreza públiku no privadu atu halo kobertura ba elisaun Prezidenti ho Lejislativu 2017 ho igual.

“Lei elisaun nian iha artigu balun hatete katak mídia sira hakarak ka lakohi, liu-liu instituisaun públiku tenki fó fatin hanesan ba partidu polítiku (PARPOL) hotu-hotu no kandidatu Prezidenti Repúblika,” Nelio Isaac Sarmento bolu atensaun ba jornalista no mídia nain sira iha Salao Luz Clarita bainhira loke Workshop Mídia no Obstaklu iha elisaun ne’ebé organiza hosi Organizasaun Jornalista Timor-Leste AJTL, Kuarta (25/01/2017).

Nelio hatutan katak, bainhira partidu polítiku no kandidatu sira la satisfas ho produtu jornalista sira nia iha elisaun, agora dadaun Timor-Leste iha ona Konsellu Imprensa ho nune’e bele hato’o keiza ba Konsellu Imprensa.

Tuir Nelio haree ba esperensia elisaun hirak ne’ebé mak liu ona partidu polítiku sira sempre lamenta ho informasaun sira ne’ebé mak fó sai hosi mídia liu-liu kona ba duransaun noticia hosi Radio no Televisaun no kolokasaun noticia iha pajina hanesan jornais.

“Maluk sira situasaun ne’e mak ita infrenta, maibé ha’u hakarak uza oportunidade ida ne’e hodi fó hanoin ba mídia hotu-hotu katak, kontribuisaun susesu mídia nian iha festa demokrasia bainhira ita fó informasaun justu,”eis Xefi Redasaun TVTL ne’e fó hanoin.

Hodi dehan tan, informasaun ne’ebé fó sai tenki kredivel liu fó sai programa ne’ebé mak partidu polítiku no kandidatura PR sira promete. No ikus mai mídia tenki akompaña nafatin bainhira sira hetan ukun ou sai PR hodi asegura katak promesa ne’ebé mak halo ona ba eleitor sira implementa ou la’e.

“Kampaña iha promesa oin-oin bainhira hetan ukun halo ka la halo jornalista iha obrigasaun hodi buka hatene nafatin,” Nelio Isaac salienta. (Jornalista: Manuel Pinto/ Editór: Gantry Meilana)

Foto: Sekretariu Estadu Komunikasaun Sosial, Nelio Isaac Sarmento loke workshop kona ba "Dezafiu Kobertura iha Eleisaun" ne'ebe organiza hosi AJTL ho SEAPA no apoiu hosi SEKOMS. Photo: ANTIL/Antonio Goncalves

Sem comentários: