Naran Universidade Labele Apoiu Parpol

DILI – Asosiasaun Akademika Estudantil Universidade Nasional Timor Lorosae (AAE-UNTL) husu ba universitariu sira, labele uza universidade nia naran hodi fo apoiu ba kandidatura no Partidus Politikus (Parpol).

Tuir Portavoz AAE-UNTL, Januario Freitas Pinto katak, hanesan estudante universitariu labele mistura mundu akademiku.

Husu ba universitariu hotu atu labele mistura mundu akademiku ho partidu politiku (Parpol) sira. Hodi nunee bele dignifika no fo onra ba valores mundu akademiku,” dehan Januario ba jornalista sira liu husi konferensia imprensa, neebe mak halao iha kampus sentral-UNTL, Caicoli-Dili, Kuarta (25/01/2017).

Januario haktuir, bazeia ba natureza mundu akademiku nia iha mundu tomak neebe hamriik independente, neutru, imparsial no apartidarismu. Nia salenta, oras nee komesa lori universitariu nia naran hodi fo apoiu partidu balun ba interese partidu nian, hanesan apoiu kandidatura Prezidente nunee mos partidu politiku sira iha Timor Leste.

Iha fatin hanesan, Estudante-UNTL, Faustino Soares dehan, hanesan estudante universitariu nee independente, neutru, imparsialidade no apartidarismu atu bele halo transformasaun nomos halo kontrolo social ba nasaun nee. Informasaun kompletu iha STL Jornal no STL Web, edisaun Kinta (26/1/2017). Raimundo S. Fraga

Suara Timor Lorosae