Susesu Eleisaun Responsabilidade Mútua Iha Governu

DILI (ANTIL)—Prezidenti Parlamentu Nasionál, Aderito Hugo da Costa afirma katak eleisaun Prezidensial no parlamentar ne’ebé mak akontese iha tinan ida ne’e nia susesu determina hosi responsabilidade Governu nian.

“Susesu elisaun ida ne’e nia responsabilidade importante liu mak governu, STAE ho CNE halo de’it implementasaun ho supervizaun,” Aderito Hugo da Costa informa ba ANTIL iha sala konfrensia Parlamentu Nasionál (PN) foin lalais ne’e.

Nu’udar Prezidenti PN nia hein katak orgaun sira ne’ebé mak tutela ba elisaun bele funsiona ho efisiensia no efektivu atu nune’e elisaun ne’ebé agora akontese bele finaliza ho rejultadu ida ne’ebé di’ak ba ema hotu nia hakarak hanesan rejultadu ne’ebé kredibel basa iha elisaun ne’e tau matan mós hosi observador internasionál sira.

Nune’e tuir Aderito Hugo bainhira rejultadu elisaun kredibel sei hamorin mós timor nia kapasidade intermo de organiza elisaun iha mundu internasionál.

Ho ida ne’e mak Aderito husu ba STAE, CNE, Polísia Nasionál Timor-Leste ho Tribunál atu asegura elisaun liuhosi meus familiar ho lei ne;ebé mak iha atu nune’e iha akontesimentu ruma ne’ebé ita la espera bele halo atuasaun bazeia ba regras mediatamente.

Hodi nune’e iha elisaun ne’ebé mak sei mai la bele akontese tan informasaun balun ne’ebé antes ne’e serkula ona katak rezultadu eleisaun la kredivel tanba makina STAE nia halo jogu.

“Informasaun ne’e ladun di’ak, la fó valor ba servisu STAE nian, ita de’it la valoriza ona ema seluk oinsa,” Aderito Hugu hakotu lia. (Jornalista: Manuel Pinto / Editor: Gantry Meilana)