L-7 HO JORGE ALVES APOIA LUGU

Veteranos, Cornelio Gama ‘L7’ ho Jorge Alves deklara fo apoia ba kandidatu Prezidenti Republika (PR) independente, José Luis Guterres ‘Lugu’.

“Hau mai husi frente klandestina no frente armada fo apoiu masimu ba kandidatura independente Jose Luis Guterres ‘Lugu’, atu eleva identidade hotu-hotu hodi asegura estabilidade rai ida ne’e nian,”  hateten Jorga Alves, ba jornalista sira iha Sede kampanha nasional kandidatu PR Jose Luis Guterres “Lugu” iha Vila Verde, Dili, Kuarta (1/3/2017).

Lugu peromete katak, wainhira nia hetan fiar husi povu ida ne’e hodi ba tuur iha Palacio Aitarak Laran, nia sei harii Gabineti Veteranus nian iha Palacio Presidensial hodi bele akomoda interese no valores veteranus hotu nian.

“Pesoalmente hau hanesan mos ema rezistensia ba iha prosesu independensia, hau la lori organizasaun, maibe hanesan pesoal hakarak fo apoiu ho konsiensia ho moral ne’ebe mak iha,” afirma Jorge Alves.

Eis Komandante FALINTIL,  L7 mos fo apoiu masimu ba kandidatura Lugu, tanba kandidatu ne’e uluk hanesan membru Comite Central Fretilin (CCF).

Lugu orgulhu tebes ho prejensa veteranus sira nian ne’ebe mak ho sira nia apoiu ba ninia kandidatura. “Ami simu ema lubuk ida mai husi partidu seluk no mos veteranus mai husi frente klandestina, ami ho laran ksolok simu sira, no ami realsa bei-beik katak kandidatura ne’e independente, tanba atu sai prezidente ne’e ba ema hotu, ukun ba ema hotu,” hateten kandidatu Lugu.

Kampanha kandidatu Lugu nian sei prezide husi veteranu Jorge Alves ne’ebe indikadu ona nudar koordenador ba kampanha nian.

“Ita nia komandante L7 fo hanoin barak saida los maka atu halo no atu halo ba oin, ne’ebe laran ksolok teb-tebes ba veteranus sira ne’ebe mak koalia ho hau, sira barak publiku mak ladun hatene, maibe sira nia maluk hanesan ema rezistensia nian hatene malu,” hateten Lugu.mia

Jornal Nacional Diário