Kapasidade Kompras Populasaun Sei Menus

DILI-Kapasidade kompras populasaun sei menus tanba, kompara ho folin sasan aas liu.  Nee duni, populasaun laiha kbit atu sosa.

Tuir Adjuntu Vise Diretor LH Laurentino Alves katak, Timor-Leste (TL) ekonomikamente sei depende liu ba sasan importasaun neebe emprejariu sira importa husi rai liur mai TL.

Nee duni, sasan sira neebe tama iha Portu Dili selu taxa ba estadu karun liun, otomatika inportador sira mos faan sasan folin sae atu nunee sir abele hetan lukru. Tanba nee mak ema sira neebe iha nivel ekonomia bele sosa, maibe povu kiik laiha kbit labele sosa.

Hau hanoin kapasidade povu kiik atu sosa sasan menus tanba, sira laiha kapasidade finanseiru atu sosa sasan folin boot,” katak Laurentino ba STL iha Farol Dili, Kuarta (5/4/2017).

Tanba nee katak, Laurentino, tuir observasaun LH nota populasaun TL balun sei moris kiak, dalaruma loron ida han dala ida deit, maibe sira neebe servisu iha osan bele sosa sasan folin aas.

Indikasaun haree kresementu ekonomia povu kiik nian, sei fraku tebes, tanba nee presiza governu liu husi Ministeriu Comersiu Industria e Ambiente (MCIA) kontrola folin sasan iha merkaduria. Atu nunee emprejariu sira faan sasan folin normal hodi fasilita povu kiik laiha kbit bele sosa nesesidade baziku hodi responde ba sira nia nesesidade moris loron-loron.

Nunee mos, Deputadu Domingos Carvalho Araujo nuudar Vise Prezidente Komisaun D hatete, folin sasan sae tanba TL adopta merkadu livre. Nee duni, hanoin governu liu husi MCIA tenke kontrola sasan folin iha merkaduria atu nunee emprejariu sira labele halo manipulasaun ba folin sasan.

Hau hanoin sasan folin sae governu liu husi MCIA tenke kontrola sasan folin iha merkaduria, atu nunee emprejariu faan sasan ho folin neebe normal. Nunee bele fasilita povu  kbit laek bele sosa netik fos saka ida hodi konsumi,’’katak Domingos.

Nunee mos Diretor Regulacao Comersial Domingos Guterres hatete, kapasidade kompras povu kiik menus, tanba sira laiha osan atu sosa sasan ho folin aas. Maibe, kona-ba sasan nesesidade baziku ho material konstrusaun folin iha merkaduria normal tanba, ekipa tekniku husi MCIA liu husi dirasaun nasional regulacao comersial ho komersiu externu kada semana kontrola folin sasan iha terenu. Josefa dos Santos

Suara Timor Lorosae