quinta-feira, 6 de abril de 2017

Tempu Kuarezma Hakbesik Ema ba Maromak

DÍLI, (TATOLI) - “Kuarezma halo ita besik fila fali ba Maromak. Dala barak ita presiza Maromak bainhira ita iha difikuldade nia laran, bainhira ita hasoru problema. Dalaruma iha ksolok umanidade nian ita haluha Maromak nia prezensa.”

Lia hirak ne’e hato’o hosi Diakonu Nívio Correia Lebre ne’ebe haklaken tan, kuarezma nu’udar tempu  no tinan foun ida atu ita refleta ita-nia aan tanba tempu barak liu ita hala’o serbisu no iha preokupasaun oioin nune’e halo ita-nia fiar sente sai fraku.

Tanba ne’e, iha tempu kuarezma, ema hotu buka hakbesik no kontempla fila fali ita-nia aan ba Maromak tan Nia domin boot tebes, to’o nia husik nia oan hodi mai salva ema maksala.

“Tempu kuarezma ne’e ita buka hakbesik no hadi’a aan hodi bele tama fila fali iha domin no fidelidade Maromak nian. Domin Maromak nian, nu’udar domin ne’ebé halo ita hamutuk hodi sai família ida de’it,” haklaken Diakonu Nívio Correia Lebre ba funsionáriu no estrutura tomak Universidade Nacional Timor Lorosa’e (UNTL), iha igreja Motael, Díli, kuarta (05/04/2017) iha atividade reflesaun kuarezma nian.

Diakonu Nívio esplika mós elementu importante iha kuarezma mak jejun, orasaun no karidade. Jejun ne’e símbolu purifikasaun katak hamoos ita-nia toman aat ka ita-nia sala. Tanba ne’e kuarezma nu’udar oportunu ida atu hadi’a ita-nia aan husi sala.

Jejun nu’udar disiplina ida ne’ebé hanorin mai ita atu sai ema ne’ebé loos no ema ne’ebé justu tuir Maromak nia hakarak.

Tuir mai, orasaun katak bainhira ita iha problema barak, liturjia no Santa Kreda fó hanoin fali mai ita atu haree no komunika ho Maromak, loke ita-nia neon ba Maromak atu Nia serbisu hamutuk ho ita iha ita-nia moris lorloron.

Seluk, karidade katak ita labele hanoin de’it ita-nia aan maibé presiza mós hanoin ema seluk tanba ita moris la’ós mesak maibé iha família. Ita presiza kompartilla ita-nia moris ho família ho domin no domin ne’ebé nakonu ho sensu família nian. Karidade nu’udar vertude ne’ebé mak boot liu.

Hanoin hikas tinan mizerikordia nian, 2016, Diakonu Nívio Correia Lebre haklaken katak nu’udar kristaun ita mós hola responsabilidade nu’udar eskolante Jesus nian.

“Ita sai matan, liman no ain ba ema seluk ne’ebe mak presiza. Iha espiritu sensibilidade no responsabilidade nu’udar Kristaun,” nia haklaken.

Hatutan mós katak kuarezma halo ita hakle’an ita-nia domin, domin ne’ebé nakonu ho mizerikordia.

Reflesaun ba estrutura no funsionáriu UNTL ne’e foti bazea ba evanjellu Saun Lukas, 16: 19-31 kona-ba Ema riku no Lazaru.

Iha reflesaun ne’e, haktuir ba evanjellu ne’e, Diakonu Nívio Correia esplika katak ita ema presiza halo tratamentu ne’ebé hanesan ba malu, labele haree ba ki’ik ka ki’ak tan ita hotu nu’udar prezente Maromak nian.

Nune’e, ita keta dezvaloriza ema seluk nia kualidade umanu maibé presiza konsiente iha agradesimentu no gratidaun (laran luak) ba malu.

Nia hatutan, bainhira riku, ema lakon senstividade ba ema ki’ak no ki’ik sira. Nune’e mós, ema riku sente kontente ho buat ne’ebé nia iha no dalaruma bele haluha no desvaloriza ema seluk.

Sita Saun Paulo nia liafuan hodi dehan mós katak domin ba osan nu’udar buat aat hotu nia huun. Osan nu’udar motiva prinsipál husi korupsaun ho fonte husi inveja no buat seluk tan.

Riku ne’ebé wa’in halo ema baruk ten no sente moris depende liu ba sasan maibé infelizmente nia sei la seguru ida. Ema riku bele loko aan no hatudu poder ba buat ne’ebé nia iha to’o serbi osan liufali Maromak no nia maluk sira.

Tanba ne’e, diakonu ne’e eplika katak kuarezma nu’udar oportunidade mai ita atu refleta oinsa halo tratamentu ba ema seluk hanesan prezente ida mós husi Maromak.

Atu konklui, Diakonu ne’e reforsa, bainhira ita hadi’a ita-nia aan, ita-nia frakeza ho domin no karidade, maske ita iha no hasoru dezafiu sei mosu ksolok mai ita.

Basá, kuarezma ne’e nu’udar momentu oportunu atu hadi’a ita-nia aan, buka solusaun ba problema. Ikus mai, espíritu no grasa sei lori ita ba hamutuk iha ministériu paskál nian hodi hadi’a ita nia fuan no fila fali ba Maromak, renova fuan no halo konversaun katak fila fali ba Maromak.

Notísia no evanjellu Saun Lukas nian bele ne’e bele asesu mós iha link ne’e: http://www.tatoli.tl/2017/04/pe-adriano-ema-kiik-no-kiak-hatene-agradese/ - (Jornalista: Rafy Belo / Editor: Gantry Meilana)

Sem comentários: