Sidadaun Estranjeiru Tama Sai TL Kuaze Rihun 43

DILI - Sidadaun estranjeiru neebe mak tama sai iha Timor leste durante tinan 2017 too iha loron 31 fulan Marsu, kuaze rihun 43 no sira neebe hela iha Timor kuaze  iha rihun 9 resin.

Tuir Ministru Interior Longuinhos Monteiro katak enkontru neebe koalia ho Prezidente Republika koalia kona ba servisu imigrasaun nian, liu-liu ba movimentu no sirkulasaun sidadaun estranjeiriu iha teritoriu Timor leste.

Hau subskreve deit katak ita iha 43 Mil Movimentu sidadaun estranjeiru iha ita nia rai too iha 31 marsu 2017 no sira neebe mak hela iha ita nia rai 9.002, ita kontrola sira hanesan bai-bain,” dehan Longinhos ba Jornalista Kuarta (05/04/2017) iha Palasiu Prezidensial Nicolao Lobato.

Nia hatete parte seguransa kontinua halo kontrolu ba sira nia movimentu no sira nia prosesu tama tamba iha sistema neebe diak hodi kontrola sira neebe mak hela iha Timor Leste.

Iha fatin ketak tuir Observador Politiku Jose da Silva katak Timor Leste nudar nasaun demokratiku no lei mos fo dalan ba sidadaun estranjeiru sira halo halo sirkulasaun hanesan turista no mos servisu.

Nia hatete parte seguransa mak tenki halo kontrulu neebe makas ba sidadaun estranjeiru neebe halo sirkulasaun iha rai laran tamba iha balun neebe tama bele lori aimoruk hodi estrada joven sira. Timotio Gusmao

Suara Timor Lorosae