quinta-feira, 6 de abril de 2017

Prezidente Brazil felisita xefe Estadu foun eleitu Timor-Leste nian

Prezidente Brazil, Michel Temer, haruka ona mensajen felisitasaun ida ba xefe Estadu foun eleitu hosi Repúblika Demokrátika Timor-Leste nian, Francisco Guterres Lu-Olo, embaixada Brazil nian iha Díli fó sai hosi komunikadu ida iha loron-kinta ne'e.

"Ha'u iha onra no satisfasaun atu felisita ita-boot tanba ita nia vitória expresivu, ne'ebé hetan iha turnu dahuluk hosi eleisaun prezidensial sira iha loron 20 Marsu", Temer hakerek iha nia mensajen felisitasaun ba Francisco Guterres Lu-Olo.

Prezidente brazileiru subliña ona katak "relasaun Brazil nian ho Timor-Leste marka hosi sentimentu klean solidariedade nian ne'ebé ezisti hosi povu ho Governu brazileiru ba nasaun irmaun, mai hosi heransa luzófonu hanesan, hosi admirasaun ba aten-barani hodi konkista independénsia no kapasidade Timor-Leste nian hodi hametin instituisaun demokrátiku sira".

"Bainhira okupa agora daudaun prezidénsia hosi Komunidade Nasaun sira Lian Portugeza nian (CPLP), ha'u hein katak bele dezenvolve relasaun bilateral sira entre Brazil ho Timor-Leste no aumenta koperasaun ne'ebé iha entre ami nia nasaun sira", Michel Temer hatete.

Iha loron 30 Marsu, Tribunal Rekursu Timor-Leste nian, instánsia judisial aas liu iha Timor-Leste, sertifika ona rezultadu ikus sira hosi eleisaun prezidensial sira iha loron 20 Marsu nian no konfirma ona eleisaun hosi Francisco Guterres Lu-Olo.

SAPO TL ho Lusa

Sem comentários: