Laiha Konsensia, Foer Naktiba Iha Valeta Laran

DILI - Administrasaun Munisipiu Dili (AMD) motan ona foer fatin iha fatin-fatin, hodi fasilita komunidade sira tau foer iha laran. Tanba Kapital Dili nuudar Kapital Nasaun Timor-Leste nee duni, presiza ambiente neebe mos.  Maibe komunidade kontinua soe foer ba valeta laran hodi rejulta valeta naktiba arbiru liu-liu iha tempu udan.

Tuir Ekipa Foti Foer Munisipiu Dili, Antonio Soares hatete, hanesan ekipa neebe raut foer dalaruma ladun kontente, tanba komunidade sira halo finji lahatene, kontinua soe nafatin foer ba valeta laran.

Iha parte ida mos ita nia autoridade lokal sira ladun tau avizu neebe klean ba komunidade hodi tau foer tuir fatin,” dehan Antonio ba STL iha Motael, Tersa (19/4/2017).

Tuir Antonio katak, tuir lolos autoridade lokal sira fo atensaun nafatin ba komunidade atu labele soe foer iha baleta laran nunee mos fatin publiku.

Komunidade tenki sente katak nasaun nee ninian, entaun hadomi ba hodi labele soe foer iha valeta laran.

Nuudar Timor-oan hakarak ukun-aan tenki hadomi ambiente nunee soe foer iha fatin labele soe arbiru deit. Soe foer arbiru deit ida nee hatudu ona hahalok neebe lafo kontribuisaun ba desenvilvimentu nasaun.

Xefe Departementu Servisu Munisipiu Dili (SMD), Domingos dos Santos Soriano dehan, los duni too agora komunidade kontinua laiha konsensia nee duni soe foer iha valeta laran nomos iha estrada publiku.

Tanba nee SMD sei kontinua tun nafatin ba halo sosializasaun ba komunidade sira atu labele soe foer arbiru ba iha valeta laran nomos iha estrada.

Nunee mos, Maria Ponciana Ximenes nuudar komunidade dehan, nia hanesan komunidade dalaruma sente ladun kontenti, tanba iha maluk komunidade barak laiha konsensia atu soe foer ba iha fatin gosta soe foer iha valeta laran. Nee duni halo valeta naktiva arbiru liu-liu iha tempu udan.

Tuir lolos katak, Maria, nuudar sidadaun ita ida-idak tenki iha konsensia atu oinsa bele hadomi ita nia ambiente rasik. Sonia Ferreira

Suara Timor Lorosae