PLP Hakarak Muda Sistema Governasaun

DILI: Partidu Libertasaun Populár (PLP) iha ambisaun boot hakarak atu muda no simplifika sistema burokrasia iha Timor‐Leste.

Atu muda sistema balun iha rai laran, PLP hahú implementa husi uma laran ne’ebé forma estrutura ne’ebé diferente ho partidu sira seluk, tanba iha PLP nia laran la eziste estrutura sekretáriu jerál.

Prezidente Divizaun Veteranu no kombatente, André da Costa Belo ‘L4’ hatete, PLP eziste ho vizaun no misaun ne'ebé klaru, hakarak atu halo mudansa tomak ba prosesu hotu ne'ebé la’o la di'ak iha nasaun ne’e.

Nia rekoñese katak estrutura PLP laiha sekretáriu jerál partidu só iha mak presidente partidu ho estrutura, tanba kada partidu ida‐idak iha nia sistema no karakter polítika.

“Planu sira ne’e bazeia ba ami nia polítika no programa kuandu ami presiza sekretáriu jerál ami tau, maibé ami la presiza ami sei la tau sekretáriu jerál iha estrutura partidu nian”, dehan L4, iha resintu UNDIL, horisehik.

Nia hatutan, iha eleisaun parlamentár mak povu fó fiar ba PLP atu ukun ho votu maioria simples, partidu ne’e uluk kedas hanoin ona atu lori Taur Matan Ruak sai primeiru ministru, atu kontinua halo dezenvolvimentu ba povu no nasaun ne’e.

André dehan, ho estrutura ne'ebé PLP iha, ninia orientasaun atu halo mudansa ba sistema governasaun semi‐prezidensiál ba prezidensiál, maibé ne’e la'ós buat fasil atu atinji metas ne’e, tanba hakarak ka lakohi tenke manan maioria absoluta iha eleisaun atu bele halo mudansa ba prosesu ne’e.

Entretantu, antes ne’e Partidu FRETILIN kestiona makaas ho partidu foun balun ne’ebé iha inisiativa hodi muda sistema governasaun Timor‐Leste nian liu husi revizaun Konstituisaun Repúblika Demokrátika Timor‐Leste (K‐RDTL).

Deputadu Bankada FRETILIN, Antonino Bianco hatete, partidu foun sira ne'ebé foin mosu mai hanoin katak fasil tebes atu muda konstituisaun ho sira nia programa ne'ebé iha.

Maibé, nia dehan, sé de'it atu mai ukun nasaun ne’e fofoun hakarak ka lakohi tenke hakru'uk ba lei inan konstituisaun, tanba lei ina mak bele orienta hodi halo servisu iha Estadu ne’e

Nune’e, Deputadu Bankada FRETILIN, Joaquim dos Santos hatete, konstituisaun la bandu sidadaun ida atu halo mudansa polítiku ba futuru nasaun nian, maibé tenke halo tuir regra demokrátiku.

Nia hatutan, iha nasaun ne’e laiha sistema ditadura, tanba ne’e sé mak hakarak atu halo mudansa ba valór Estadu ne’e nian tenke tuir regra demokrátiku, la'ós mai hakarak atu sobu tun‐sa’e sistema ne’e tuir sira nia hakarak.

Jacinto Xavier | Independente