Ministru Estadu timoroan, José
Ramos-Horta, defende iha loron-kuarta ne'e, iha Bruxelas, katak solusaun di'ak
liu ba problema polítiku atual iha nasaun maka konvokasaun hosi eleisaun
antesipadu sira, ne'ebé nia konsidera hanesan di'ak hodi "tenta determina
hodi harii Governu ida".
Iha deklarasaun ba jornalista
sira, antigu xefe Estadu no antigu primeiru-ministru hatete katak nia la hatene
rezultadu hosi reuniaun Konsellu Estadu nian ne'ebé halo iha loron-kuarta ne'e,
konvoka hosi Prezidente hodi buka solusaun ida ba problema polítiku - ne'ebé
nia labele partisipa tanba iha daudaun Bruxelas ba diálogu polítiku ida ho
Uniaun Europeia - maibé nia hein katak sei iha solusaun ne'ebé, tuir nia
hatete, sei apoia hosi "maioria" ema timoroan sira no ne'ebé
"demokrátiku liu": realizasaun ba eleisaun foun sira.
"Laiha buat ida demokrátiku
liu duké eleisaun antesipadu, no karik di'ak no demokrátiku liu duké tenta
determina harii Governu ida hosi inkluzaun boot ida, unidade nasional nian,
ne'ebé depois la funsiona, tanba iha diferensa barak no boot tebes", iha
nível personalidade sira nian no mós iha prioridade sira, hatutan hosi atual
ministru Estadu no Konselleiru ba Seguransa Nasional.
Aponta hanesan hatutan pozisaun
ne'ebé defende hosi primeiru-ministru, Mari Alkatiri, no hosi Fretilin, José
Ramos-Horta afirma katak, hosi informasaun sira ne'ebé nia simu "iha
privadu, hosi dalan informal, hosi kanal barak, opiniaun maioria iha
Timor-Leste - Igreja, sosiedade sivil, partidu polítiku sira - maka di'ak liu
iha eleisaun antesipadu sira".
Ministru la fó valor ba problema
polítiku iha nasaun, konsidera katak hanesan rezultadu hosi sistema
multipartidarizmu no diversidade hosi opiniaun, hodi komenta katak hanesan
natural akontese hafoin laiha posibilidade hodi "negosia konsensu ida ho
partidu sira seluk hodi iha maioria".
"Hafoin eleisaun, partidu
sira labele halo konsesaun hanesan ne'e ho partidu sira seluk ne'ebé halo
traisaun ba programa partidu nian rasik. Polítiku sira tenki preparadu nafatin
hodi fó autorizasaun, halo kompromisu sira, maibé la'ós halo traisaun ba eleitoradu",
nia hatete.
Ramos-Horta fó hanoin katak
"demokrasia tuan liu duké Timor-Leste" atravesa situasaun sira ne'ebé
hanesan, aponta ba títulu ezemplu nian ne'ebé "iha España tenki halo
eleisaun tolu iha tinan ida nia laran hodi harii Governu ida, xanxeler (alemã
Angela) Merkel la konsege harii Governu ida no Béljika la harii governu ida
durante tinan rua nia laran".
"Klaru, diferensa entre
nasaun sira ne'e ho Timor-Leste maka nasaun sira ne'e iha ekonomia metin,
instituisaun sira funsiona no área privadu hanesan boot, nune'e (impase
polítiku ida) la afeta tebes ekonomia nasaun nian. Iha ami nia kazu, bainhira
ekonomia tama hosi Orsamentu Jeral Estadu nian, problema afeta atu laiha
OGE", nia rekoñese.
Maibé, nia afirma
"importante maka nasaun senti hakmatek tebes" no, maski hosi
situasaun atual, "komérsiu kontinua dinámiku no investidor sira tama
nafatin, tanba iha konfiansa iha nasaun no hatene katak demokrasia ho dame
metin ona iha nasaun".
Timor-Leste, iha fulan barak nia
laran, hasoru hela períudu polítika ne'ebé laloos ho opozisaun, maioria iha
Parlamentu Nasional, xumba programa Governu nian no proposta ida hosi Orsamentu
Retifikativu, no aprezenta ona proposta ida sensura nian ba ezekutivu no
proposta ida hodi hatún prezidente parlamentu nian.
Bainhira Governu monu, Prezidente
timoroan iha kompeténsia hodi desidi atu aplika solusaun ho Governu foun ida
ne'ebé harii hosi atual kuadru parlamentar, ezekutivu ida hosi inisiativu
prezidensial ka eleisaun antesipadu.
To'o agora, seidauk kumpri
rekizitu konstitusional sira hodi nune'e Lu-Olo bele demiti Governu, tanba lei
baze determina katak bele demiti de'it Governu iha inísiu hosi lejislatura
foun, iha kazu ba pedidu demisaun nian, mate ka laiha kondisaun fíziku
permanente hosi primeiru-ministru, rejeisaun hosi programa ba dala rua (maski
foin maka rejeita dala ida de'it), xumbu ida ba votu konfiansa ida ka
aprovasaun hosi proposta sensura ida.
SAPO TL ho Lusa
Sem comentários:
Enviar um comentário