Situasaun PN, Aplika Regras Estranu

DILI – Bazeia ba impase politik neebe lao iha Parlamentu Nasional (PN), diferensa politika entre opozisaun no kooligasaun, tanba nee PN aplika regras foun pasa revista ba ema tama sai uma fukun PN.

Preokupasaun nee hatoo husi Deputada Bankada PLP Signi Chandrawati Verdial liu husi komferensia imprensa Tersa (23/01/2018) katak, agora dadauk mos Prezidente Parlamentu Nasional, (PPN) dezenvolve hela ona imajen hodi hatudu ba publiku katak resintu PN iha hela faze emerjensia ida nia laran. Servisu seguransa PN nian, halo pasa revista ba ema no kareta neebe tama sai resintu PN.

Situasaun nee konsidera estrañu tebes kompara ho tratamentu normal/trankuilu iha edifisiu orgaun soberanu sira seluk hanesan Presidensia Ai-Tarak Laran, Edifisiu Palacio Governu, no Edifisiu Tribunais,” hatete Deputada PLP nee lee sai komunikadu imprensa iha Bankada CNRT PN.

Nia hatete, haree ba situasaun agora nee kompara Iha tempu krize tinan 2006 deit, nunka aplika pasa revista ida demaziadu hanesan hatudu iha PN neebe mak lao dadaun.

Entretantu observasaun jornalista haree iha terrenu, katak situasaun neebe mak lao iha Uma Fukun Parlamentu Nasional (PN), oras nee dadaun seguransa sira pasa revista ba ema tama sai uma fukun PN.

Iha pasa revista nee realidade hatudu seguransa sira kontrola ba ema balu deit, maibe balu lae, tanba haree ba funsionariu sira, inklui jornalista sira tenke formal, maibe ba iha mos ema balu neebe  mak seguransa sira lahalo pasa revista, no balu laformal tuir regras neebe iha no haruka.

Guihermina Franco | Suara Timor Lorosae