Money Politika laos Edukasaun Diak

DILI – Money politika laos edukasaun neebe diak ba povu, tanba nee Partidu politiku (Parpol) labele fahe osan no material atu manan votus.

Tuir Xefe Bankada Fretilin, Francisco Branco dehan, oras nee dadaun informasaun iha Media Sosiais buras kona ba money politika, nia dehan ida nee sira rezista barak tebes, iha ona movimentu parpol balu komesa fahe material konstrusaun tun sae, ida nee  hanoin katak labele forma politika ida atu sosa votus.

Hahalok ida nee laos politika neebe atu eduka povu ho diak, i ami haree hahalok ida nee akontese iha fatin-fatin hanesan iha Ainaro, Same komesa iha ona movimentu ba buat sira nee. maibe ida nee laos  politika neebe diak parpol nian ba povu,” katak Branco ba STL Tersa (27/02/2018), iha PN.

Nia dehan, Parpol sira ba baze atu aprezenta programa, atu nunee povu bele hili hodi sai hanesan baze atu implementa ba povu nia moris, laos ba fahe material konstrusaun no mos osan atu hodi sosa votus povu nian maibe rezolve povu nia moris.

Iha fatin hanesan Deputada PLP, Maria Angelina Lopes hatete, informasaun ida nee sira mos rona, maibe laos deit fahe osan, maibe parpol sira balu uza tempu hodi uza fasilidade governu, no eskoltu hodi halo atividade iha Sabado no Domingo.

Ida nee parpol sira nia direitu, maibe laloos sira uza fali sasan estadu nian hodi halao servisu partidu nian, aat liu tan informasaun mai husi baze katak sira fahe osan no promete ba povu katak sira manan sei halo uma, maibe haluha tiha katak halo uma ba povu nee hahu kedas iha VI governu nian, laos agora mak foin hanoin atu halo uma ba kbiit laek sira. 

Notisia kompletu lee iha jornal edisaun Kuarta, (28/02/2018)

Guilhermina Franco | Suara TimorLorosae