sexta-feira, 29 de junho de 2018

Lere: Dupla Sidadania Ne’e Fahe Domin

PARTILHAR

DILI, (TATOLI) — Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, hateten kestaun dupla ka tripla sidadania ne’e sai preokupasaun boot, tanba fahe domin ba entre rain rasik no nasaun seluk.

“Uluk kedas ha’u kontra dupla sidadania. Ha’u timoroan tenke sidadania ida de’it (sidadaun Timor) para ha’u iha sentidu responsabilidade ba ha’u nia rai. Ezemplu, ita halo komparasaun karik, bainhira ita iha fén rua no fén tolu ba leten, ita fahe domin ba ita nia fén sira ne’e sei lahó konsisténsia”, Lere hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, semana ne’e, relasiona ho dupla sidadania bele lori sidadaun ida halai sees hosi responsabilidade.

Tuir eis Komandante Gerileiru ne’e katak bainhira timoroan sira sai sidadania ida de’it ne’e sei hadomi nia rai (Timor) to’o mate.

“Ha’u lakohi hanorin ita nia polítiku sira. Maibé, se ha’u kompara ba ha’u nia án karik, ha’u hadomi ha’u nia rai (Timor) to’o mate. Uluk ne’e ami lubuk ida promete ona katak ami defende rai Timor to’o mate. Ida ne’e nu’udar ezemplu ba jerasaun foun nomós ezemplu ba ukun na’in sira”, Lere afirma.

Jenerál Fitun rua haktuir, hanesan eis Ministra Finansas, Emília Pires, maske komete kazu korupsaun no nia kazu tama ona iha Tribunál maibé halai tiha ba Potugal hodi proteje án tanba dupla sidadania (Timor no Portugeza).

Jornalista: Xisto Freitas | Editora: Rita Almeida

Imajen: Majór Jenerál Lere Anan Timur
PARTILHAR

Author: verified_user

Publicação luso-timorense sem fins lucrativos

0 comentários: