sexta-feira, 29 de junho de 2018

Aban, PN Fó Últimu Omenajen Ba Matebian Eis-Deputadu Cecilio Caminha

PARTILHAR
DILI, (TATOLI) – Prezidente Parlamentu Nasionál (PN), Arão Noe, hateten aban sábadu, PN sei fó omenajen ikus ba matebian antigu Deputadu hosi partidu Kongresu Nasionál Rekonstrusaun Timor (CNRT-sigla Pportugés), Cecilio Caminha Freitas, iha sala plenária parlamentár.

“Aban iha tuku 10.00 sei iha plenária estraordinária kona-ba votu pezar ba matebian eis-deputadu, Cecilio Caminha, nune’e iha tuku 11.00 mate isin sei lori mai plenária atu fó omenajen ikus hafoin entrega ba família atu lori ba Lospalos”, Arão Noe ba jornalista sira iha parlamentu, ohin.

Arão haktuir molok mate isin transporta mai, família hosi matebian solisita mai parlamentu atu ajuda hodi fasilita lori mate isin hosi Bali mai Timor-Leste, nune’e, ami haruka karta ida ba Ministériu Negosiu Estranjeiru no Kooperasaun, no sira kontaktu direitamente ba konsuladu Timor-Leste nian iha Bali, to’o ikus sira fasilita no trata duni dokumentu ho kompletu hafoin dezloka mate isin mai Timor-Leste horiseik.

“Ha’u agradese ba kooperasaun entre Ministériu Negosiu Estranjeiru no Kooperasaun ho Parlamentu Nasionál inklui konsuladu iha Bali nia esforsu tomak bele trata dokumentu sira kompletu hafoin halo dezlokasaun mate isin mai Timor-Leste”, nia agradese.

Eis deputadu, Cecilio Caminha, durante nia moras, nia hala’o hela tratamentu iha Óspital Kasih Ibu Bali-Indonézia ho moras diabetes (ran midar) to’o ikus labele salva nia ka iis kotu.

Mate isin Cecilio Caminha dezloka hosi Bali mai Timor-Leste iha 28 juñu ho aviaun Sriwijaya Air iha tuku 13:50.

Matebian ne’e husik hela nia fen Marciana do Rego Caetano ho oan nain neen.

Matebian moris iha Lospalos, 11 Maiu 1977 no mate ho idade 45. Enkuantu, matebian oan hosi José Caminha ho Cecilia de Jesus Caminha no oan da neen hosi maun alin 15.

Antes Cecilio Caminha fila ba mundu seluk, nia asume kargu Prezidente Bloku Unidade Popular (BUP) iha 2017.

Nune’e mós, nia asume kargu Vise Prezidente Komisaun C Parlamentu Nasionál iha Lejislatura Da-ruak hosi partidu CNRT iha tinan 2007 to’o 2012.

Entretantu, iha 2000 to’o 2001, nia lori kargu Diretór Ezekutivu iha NGO Forum.

Jornalista: Zezito Silva | Editora: Rita Almeida

Imajen iha Tempo Timor
PARTILHAR

Author: verified_user

Publicação luso-timorense sem fins lucrativos

0 comentários: