DILI, (TATOLI) – Koordenadór
Interinu Autoridade Inspesaun no Fiskalizasaun Atividade Ekonómika no Sanitária
(AIFAESA), Joanico da Costa Soares, hatete ba futuru besik ne’e AIFAESA presiza
duni laboratóriu ida para bele garante sirkulasaun kualidade hahán sira iha
merkadu.
“Iha nasaun seluk hanesan
Indonézia iha Balai POM (Badan Pengawas Obat dan Makanan) no nasaun sira seluk
iha autoridade inspetiva, iha Timór AIFAESA tan ne’e buat ne’ebé mak importante
para tenke iha hodi fortifika nia serbisu iha atividade operasionál”, Joanico
dehan iha Bidau, ohin.
Nia afirma bainhira inspetór sira
halo atividade inspesaun suspeita hahán ruma ho kondisaun ladi’ak tenke lori
para halo teste laboratóriu hodi konfirma ba kualidade produtu ne’e katak sei
bele konsome ka la’e.
“Ida ne’e mak batalla primeiru
ne’ebé ami tau prioridade iha tinan ida ne’e, iha tinan kotuk mós tau, mas
konforme polítika Governu nian hanesan ne’e entaun ita la’o tuir de’it no iha
tinan ne’e tau nafatin para oinsá AIFAESA bele ejize nia laboratóriu própriu”.
Hodi realsa: “Se la’e ita husik
de’it hanesan ne’e futuru jerasaun tinan lima, sanulu mai ita lahatene
derepende ema moras mate, laiha moras mós mate buat sira ne’e hotu kuandu ita
halo ezaminasaun didi’ak nia risku ne’e mai husi buat sira ne’e”.
Tanba ne’e AIFAESA sente difikuldade
atu ezamina produtu sira ne’ebé deskonfia tanba laiha laboratóriu maski iha
espasu atu instala laboratóriu mas seidauk iha instalasaun kompleta ba
nesesidade laboratóriu nian tanba iha difikuldade orsamentu.
Durante ne’e AIFAESA halo
kooperasaun ho Ministériu Saúde no Ministériu Agrikultura no Peska para bele
responde difikuldade ne’ebé iha.
AIFAESA iha nia prioridade ne’ebé
konsentra ba planu anuál no estratéjiku no bainhira buat hotu la’o ho di’ak,
esperansa boot mak Governu tau importánsia ba serbisu AIFAESA nian.
“Tanba AIFAESA hala’o nia misaun
hodi proteje konsumidór no oinsá promove konkorénsia leál entre operadór
ekonómiku sira, kumprimentu lejislasaun sira ne’ebé regula atividade ekonómika,
ida ne’e ita hein katak Governu Konstitusionál Daualuk bele tau prioridade”.
Jornalista: Maria Auxiliadora | Editora:
Rita Almeida
Imajen: Ezemplu fasilidade
laboratorium. Foto google
Sem comentários:
Enviar um comentário