Prezidente Timor-Leste, Francisco
Guterres Lu-Olo, iha loron-kinta ne'e simu hosi nia homólogu indonéziu, Joko
Widodo, iha Palásiu Prezidensial iha Bogor, iha besik Jakarta, hodi hahú nia
vizita Estadu dahuluk ba Indonézia.
Xefe Estadu timoroan simu ho
honra militar sira iha Bogor, ne'ebé delegasaun ofisial sira hosi nasaun rua
ne'e hasoru malu no asina iha loron-kinta ne'e memorandu entendimentu ida.
Hafoin hinu sira ho salva ida ho
tiru dala 21, xefe Estadu sira hosi Indonézia ho Timor-Leste, ne'ebé uluk
hanesan nasaun okupante ho nasaun okupadu, halo Guarda Honra ba militar sira
ne'ebé hein sira iha espasu monumental Istana Bogor nian.
Prezidente na'in rua, ne'ebé
nunka hasoru malu - Lu-Olo eleitu iha tinan 2017, tinan rua hafoin vizita
ne'ebé Widodo halo ba Timor-Leste -, hafoin ne'e sira ba Salaun Teratai hodi
hasai fotografia, akompaña hosi sira nia feen.
Lu-Olo asina ona livru vizita
nian antes, simbolikamente, kuda ai-hun ida iha jardin sira kompleksu nian.
Hafoin ne'e, xefe Estadu na'in
rua ko'alia durante minutu balun. Konversa ida ne'ebé presiza intérprete tanba
Lu-Olo ko'alia portugés no Widodo ko'alia indonéziu.
Delegasaun Timor-Leste nian
inklui ministru Negósiu Estranjeiru, Dionísio Babo, ho xefe hosi Forsa Defeza
Timor-Leste nian (F-FDTL), Lere Anan Timur.
Delegasaun indonéziu inklui
Wirante, ministru Kordenador ba Asuntu Polítiku sira, Legal sira ho Seguransa
nian, Darmin Nasution, ministru Kordenador ba Asuntu Ekonómiku sira, Tjahjo
Kumol, ministru Administrasaun Estatal, Retno Marsudi, ministru Negósiu
Estranjeiru, Muhammad Nasir, ministru investigasaun, Teknolojia ho Ensinu
Superior nian no mós Basuki Hadimuljono, ministru Obra Públika ho Habitasaun
nian.
Prezidente Repúblika nia loron
hahú iha rate nasional Kalibata, iha sentru kapital indonéziu, hodi tau koroa
ida ai-funan nian iha monumentu ba soldadu deskoñesidu sira.
Francisco Guterres Lu-Olo, ne'ebé
akompãna hosi nia feen Cidália Mouzinho, fó ona homenajen ba soldadu indonéziu
sira, no hafoin ne'e asina livru honra nian.
Iha loron-kinta ne'e mós hanoin
atu halo vizita ba Sentru Agronómiku hosi Universidade Bogor nian no Fórum
Emprezarial ida Indonézia-Timor-Leste, iha Jakarta.
SAPO TL ho Lusa
Sem comentários:
Enviar um comentário