Lere Husu Membru Governu Labele Halai Bainhira komete Korrupsaun

DILI, (TATOLI) — Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur husu ba membru governu atu la bele halai bainhira komete krime korrupsaun. Sai membru governu nu’udar direitu ema ida-idak nian.

“Timoroan sira iha direitu tomak sai membru Governu, maibé labele repete fali aktu ne’ebé Eis Ministra Finansas, Emília Pires halo, iha ne’ebé komete tiha krime korrupsaun depois halai tiha ba rai li’ur,”   Majór Jenerál Lere Anan Timur, hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, Dili, Tersa ne’e, relasiona ho membru Governu balun ne’ebé antes ne’e Xefe Estadu rejeita fó tomada pose.

Jeneral fitun rua ne’e esplika, Prezidente-Repúblika, Francisco Guterres Lú Olo, la impede no la veta membru Governu balun ne’ebé seidauk simu pose.

“Prezidente-Repúblika hateten ba Primeiru-Ministru atu haruka lista ho kautelojamente (kuidadu) tanba kestaun kredibilidade institusionál no kredibilidade Estadu. La’ós hanesan ema balun interpreta katak Prezidente Repúblika impede membru Governu balun,” Lere esplika.

Nu’udar veteranus ida, Lere husu atu Koligasaun Aliansa Mudansa ba Progresu (AMP) atu haruka hikas lista membru Governu mai Prezidente Repúblika ho kuidadu.

Enkuantu antes ne’e bankada AMP husu ba Prezidente da Repúblika atu respeita prinsípiu prezunsaun inosénsia, no husu atu la bele julga ema antes Tribunál kondena ema ida.

Jornalista: Xisto Freitas | Editór: Manuel Pinto

Imajen: Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur