Nomeasaun hosi ministru Defeza foun Timor nian hein final hosi prosesu adminitrativu

Nomeasaun ba minitru Defeza foun timoroan nian, Filomeno Paixão, depende hela ba prosesu administrativu ida ne'ebé formaliza nia demisaun nu'udar númeru daruak hosi Forsa Defeza Timor-Leste nian (F-FDTL), konfirma hosi fonte sira Prezidénsia nian. 

"Iha prosesu administrativu ida relasionadu ho nia demisaun no pasajen ba reforma. Laiha kestaun seluk ida", konfirma hosi fonte ida hosi gabinete Prezidente Francisco Guterres Lu-Olo nian.

Filomeno Paixão nia naran hanesan nomeadu ba ministru Defeza halo parte hosi lista ne'ebé maka primeiru-ministru, Taur Matan Ruak, entrega ona iha semana liubá ba Prezidente Repúblika, ne'ebé ikusmai la fó pose ba na'in 11 hosi naran sira ne'ebé halo parte iha lista.

Kazu barak akontese tanba, karik, dirijente balun iha ligasaun ho kazu sira ne'ebé relasionadu ho Justisa, maibé Filomeno Paixão laiha ligasaun ruma.

"Iha ha'u nia kazu hein de'it atu hakotu etapa importante sira iha prosesu", Filomeno Paixão hatete rasik ba Lusa bainhira hakotu tomada pose hosi primeiru-ministru Taur Matan Ruak no hosi grupu dahuluk hosi membru sira Governu daualuk nian iha loron-sesta liubá.

Francisco Guterres Lu-Olo rasik konfirma tiha ona desizaun hosi Filomeno Paixão hodi husu demisaun hosi kargu no pasa ba reforma.

"Señór brigadeiru-jeneral halo ona pedidu pasajen ba reforma ba señór komandanta Lere no haruka ona karta ida. Ha'u hanoin katak prosesu ne'e karik sei hanesan fásil", Prezidente Repúblika, Francisco Guterres Lu-Olo, hatete ba Lusa.

"Ha'u hakarak husik rekoñesimentu maka'as ida ba buat hotu ne'ebé nia halo ona durante tinan hirak ne'e", Lu-Olo hatete.

Tanba nia pasadu no ligasaun ba forsa sira defeza nian - no antes ne'e ba frente armada hosi rezisténsia timoroan nian - Lu-Olo konsidera katak hanesan eskolla "di'ak tebes" ida ba kargu ministru Defeza nian.

Filomeno da Paixão de Jesus, moris iha tinan 1953, halo parte iha Falintil iha tinan 1975, bainhira harii hela no, ho restaurasaun Independénsia nian nia halo parte iha fileira sira Forsa Defeza nian.

Kondekora hosi Prezidente Repúblika tanba serbisu sira ne'ebé fó iha Operasaun Halibur, Filomeno da Paixão de Jesus promove ona ba koronel iha loron 14 Janeiru 2009, no hafoin ne'e kompleta Kursu Promosaun ba Ofisial Jeneral sira.

Hahú hosi tinan 2010 maka sai nu'udar xefe Estadu-Maior F-FDTL nian.

Lusa | iha SAPO TL