terça-feira, 26 de junho de 2018

Prezidente timoroan iha Indonézia, vizita dahuluk Estadu nian ba estranjeiru


Prezidente Timor-Leste nian halo vizita, entre loron-kuarta to'o loron-sesta, iha Indonézia, hanesan viajen dahuluk ba estranjeiru dezde simu pose, hodi "hametin relasaun sira entre nasaun rua", fó sai hosi Prezidénsia iha loron-tersa ne'e. 

Iha loron-kinta, Francisco Guterres Lu-Olo sei hasoru malu ho xefe Estadu indonéziu, Joko Widodo, iha palásiu prezidensial iha Bogor. Antes, Prezidente timoroan sei desloka ba semitériu asuwa'in sira nian iha Kalibata, Jakarta.

Lu-Olo nia programa vizita Estadu iha Indonézia, nasaun ne'ebé okupa Timor-Leste entre tinan 1975 to'o 2002, inklui enkontru ida entre delegasaun sira hosi nasaun rua hodi ko'alia "asuntu sira relevánsia nian ba reforsu relasaun bilateral sira" no asinatura hosi akordu ida kona-ba tributasaun duplu, tuir nota hosi Prezidénsia timoroan nian ne'ebé haruka ba Lusa.

Iha loron-sesta, Lu-Olo vizita Asembleia Konsultivu Popular, parlamentu indonéziu, no sei simu hosi prezidente Bambang Soesatyo.

Komitiva hosi xefe Estadu timoroan inklui, entre personalidade sira seluk, prezidente nia feen, Cidália Guterres, ministru Negósiu Estranjeiru, Dionísio Babo, xefe Estadu-Maior Jeneral hosi Forsa Armada sira, major-jeneral Lere Anan Timur, no emprezáriu sanulu resin.

Cidália Guterres iha ajenda halo vizita ida ba instituisaun promosaun ba planeamentu familiar nian, ne'ebé sei simu hosi governador Jakarta nia feen Anies Baswesdan, no ba jardin-infánsia ida iha Jakarta, akompaña hamutuk hosi ministru Edukasaun indonéziu, Muhadjir Effendy, ho nia feen.

Porta-vós hosi Ministériu Negósiu Estranjeiru indonéziu, Arrmanatha Nasir, destaka ona forsa hosi relasaun bilateral ho Timor-Leste, hodi subliña katak proximidade jeográfiku, istóriku ho nível "koperasaun ekonómiku no kontaktu entre povu sira", tuir akordu ho ajénsia ofisial indonézia Antara.

Ba Indonézia, vizita ne'e hanesan oportunidade ida hodi ko'alia "tema importante sira" no fatin potensial ida hodi hametin koperasaun iha área sira hanesan infraestrutura, enerjia, finansa, banku, farmaséutiku ho turizmu, indika.

Empreza estatal indonéziu sia ho empreza privadu atus resin, agora daudaun, halo operasaun iha Timor-Leste ho investimentu ida besik dolar millaun 600 resin iha projetu hamutuk 18, hatutan hosi Antara.

SAPO TL ho Lusa

Sem comentários: