PM Taur Mantein Lista Kandidatu Membru Governu Ne’ebé Rejeitadu

DILI, (TATOLI) – Primeiru-Ministru (PM), Taur Matan Ruak, hateten nia kontinua mantein lista kandidatu membru Governu ne’ebé antes ne’e Prezidente Repúblika, Francisco Guterres Lú Olo, rejeita.

“Pur enkuantu ami kontinua mantein lista membru Governu ne’ebé rejeitadu. Hafoin Prezidente Repúblika fila hikas hosi Indonézia maka foin ami halo diskusaun kle’an liu-tan ba lista ne’e”, Taur Matan Ruak hato’o ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin soru-mutu ho Xefe Estadu.

Xefe Governu ne’e hatutan loron tomada pose segunda faze ba kandidatu membru Governu da-ualu konstitusionál nian mós seidauk desididu no hafoin Prezidente Repúblika fila mai maka deside.

Taur haktuir enkontru ho Prezidente Repúblika la’ós de’it ko’alia kona-ba lista kandidatu membru Governu, maibé ko’alia mós kona-ba prosesu tranzisaun (hand over) hosi Govenu anteriór ba Governu foun.

“Ha’u mai ko’alia ho Prezidente kona-ba viazen Prezidente nian ba Indonézia iha aban ne’ebé sei akompaña hosi Ministru Negósiu Estranjeiru no Kooperasaun nomós ko’alia kona-ba prosesu tranzisaun durante loron rua (25-26 junu) iha ne’ebé ministériu balun priénsidu ona no balun seidauk”, esplika.

Prezensa Primeiru-Ministru iha Palásiu Prezidente Nicolau Lobato ho liman mamuk no la lori dokumentu ka lista ruma iha liman.

Jornalista: Xisto Freitas | Editora: Rita Almeida

Imajen: Primeiru-Ministru (PM), Taur Matan Ruak, ko'alia ho jornalista sira hafoin enkontru ho Xefe Estadu iha Palásiu Prezidensiál Bairru Pité, ohin. Foto Egas Cristovão.