ECENAKAR: “RENDIMENTU POVU MINIMU TEBES”

Tempo Timor - Problema ki’ak iha Timor-Leste sai preokupasun ba ema barak no konsidera nu’udar problema nasional, tanba faktus hatudu katak rendimentu ekonomia povu seidauk la’o di’ak, liu-liu povu iha area rurais kada loron hetan de’it U$ 10 cent. 

“rendimentu povu nian minimu tebes, tanba realidade hatudu katak, povu ki’ik sira nia kapasidade kompras  minimu maka ho osan U$ 0, 50 cent. Nune’e mós, ba sira ne’ebé hela iha area rurais dala ruma atu hetan de’it U$ 0,10 cent mós defisil tebes.” dehan estudante Universidade Nasional Timor Leste, Ecenakar da Costa ba Online Tempo Timor iha Dili, (3/8) 

Ecenakar haktuir, tinan sanulu resin tolu ona Timor-Leste restauta ninia idepedensia, ekonomia povu ki’ik nian la estabil no povu barak kontinua infrenta problema menus ekonomia tanba la iha kampu de serbisu ba sira. 

“situasaun sira ne’e halo povu kbit la’ek sira defisil tebes atu asesu ba markadoria tanba atu sosa de’it modo ka sasan ruma mós susar tanba la iha osan, ne’e duni husu ba Governu atu kria netik kampu de serbisu ruma, se lae susar atu ita atinje mehi ne’ebé dehan luta ba povu nia moris diak” estudante UNTL ne’e kestiona.

Preokupasaun kona ba ekonomia povu nian, la’os de’it mai husi estudante universitariu sira, maibe sosiedade sivil no reprezentante povu iha uma Fukun Perlamentu Nasional sempre kestiona ekonomia moris povu nian ne’e duni sira husu ba Governu atu hare problema ida ne’e ho seriu no tenke hamosu ona industria ki’ik sira, hodi nune’e povu bele ba serbisu iha ne’eba. 

Antes ne’e, iha intervista Diretur Luta Hamutuk loron hirak liu ba hateten, maioria povu Timor sei ki’ak, tanba estadu seidauk jere orsamentu ho di’ak no povu la sente benefisiu husi osan ne’ebé maka mai husi mina no gas.

“Ema balun dehan ekonomia Timor nian di’ak, maibe realidade hatudu povu barak sei halerik tanba hamlaha, dala ruma loron ida nia laran sira han de’it dala ida no poir liu han etu maran de’it, ida ne’e realidade ne’ebé maka akontese duni iha fatin balun.” Akara esklarese iha momentu ne’ebá.

Entertantu, Deputada Albina Freitas haktuir, dezenvolvimentu ekonomia iha rai laran kuaze sei depedente ba rai liur nomós fundu petroleum, maibe ba sector sira hanesan agrikultor, turismu no sector sira seluk kuaze la funsiona.

“ha’u hanoin ita presija kria planu ida kona ba produsaun setor agrikultor no setor industria ki’ikoan sira hodi komesa dezenvolve ona ekonomia Timor nian ba oin, se la’e osan ne’ebé maka ita investe barak liu sei ba hotu iha rai liur.” tenik Deputada CNRT ne’e. (**)

Tempo Timor