TROKA SAUDOZO LA-SAMA ANTONIO CONCEICAO KANDIDATU FORTE

DÍLI - Prezidente Conselho Polítika Nasionál (CPN) Partidu Demokrátiku (PD) atual Ministru Komersiu Industria no Ambiente (MKIA) Antonio da Conceicão sai kandidatu forte hodi troka saudozo Fernando La-Sama de Araújo hanesan Ministru Estadu Koordenador Asuntu Sosial no Ministru Edukasaun.

Tuir Sekretariu Jerál PD, Mariano Assanami Sabino, loron Sesta, (31/7), lideransa PD halo ona sorumutu ida ho Primeiru Ministru, Rui Maria de Araújo iha Palasiu Governu, hodi deskute kona-ba lista ne’ebé mak antes ne’e aprejenta ona ba governu.

“Aprejenta ona lista lubuk ida ba Primeiru Ministru atu fihir, atu fó kontinuasaun ba saudozo La-Sama nia fatin hanesan Ministru Estadu Koordenador Asuntu Sosial no Ministru Edukasaun,” Assanami hatete iha Aitarak-laran, Sabadu, (1/8).

Assanami hatutan, PD sempre prontu no prepara nia kargu polítiku sira hodi avansa no asumi pozisaun ne’ebé mak governu fó no PD prontu atu tutan no fó apoiu mehi ne’ebé mak saudozo La-Sama rai hela, tanba edukasaun ne’e xave importante ba Timor tomak, edukasaun mak lalatak no futuru nasaun nian.

Assanami informa, lideransa PD nian aprejenta kandidatu barak ba governu no PD mós rekomenda maka’as Prezidente CPN atual Ministru Komersiu, Antonio Conceicão ba governu atu bele asumi kargu ne’ebé mak saudozo La-Sama hosik hela.

Nia afirma, hosi lista naran kandidatu ne’ebé mak PD aprejenta ona ba governu, iha loron 03 fulan Agostu, PM sei lori ba aprejenta iha Prezidente Repúblika atu halo konsulta kona-ba naran sira depois mak halo tomada de posse.

“Desizaun hosi governu, sira simu (Antonio Conceicão) no ami mós rekomenda kader sira ne’ebé di’ak ne’ebé mak durante ne’e hala’o servisu iha Ministériu Edukasaun, ami tau hela iha governu, no Primeiru Ministru simu, sei haree depois sei aprejenta ba Prezidente Repúblika, no bainhira Prezidente Repúblika simu ona mak sei halo tomada de posse iha loron 10 fulan-Agostu ne’e”, eis Ministru Agrikultura no Peskas ne’e deklara.

                           

APMT Afilia ba PD

Entretantu, Partidu Asosiasaun Popular Monarkia de Timor (APMT) ne’ebé lidera hosi Pedro da Costa Ramalho iha loron 1 fulan-Agostu 2015 ofisialmente deklara hodi fó apoiu ba PD.

Seremonia afiliasaun ba PD ne’e hala’o iha sede APMT, Aitarak-laran Díli ne’ebé mak hetan partisipasaun masimu hosi lideransa no strutura partidu rua ne’e nian. Afiliasaun realiza, tanba antes ne’e iha loron 31 fulan-Maiu 2015 liu-ba, Prezidente APMT ho Prezidente PD saudozo La-Sama halo ona sorumutu ida iha sede APMT no ona konkordansia, nune’e iha loron Sabadu, (1/8), lideransa hosi partidu rua ne’e realiza no simu malu liu-hosi seremonia formal.

Tuir Assanami, seremonia ne’e hanesan dalan ida PD loke nia odamatan no servisu hamutuk ho APMT hodi reforsa polítika partidu nian.

Tanba PD ka’er prinsipiu harii atu tutan ispiritu heroi no funu na’in sira nian ba ukun rasik-án nian no hametin liu-tan estadu de direitu demokrátiku ida ne’e.

“Ho ida ne’e ami loke odamatan ba hot-hotu hosi OJETIL, OPJELATIL, RENETIL, hosi membru rezistensia nian hosi fatin hotu, hosi partidu istoriku sira ne’ebé mak ami nu’udar oan ukun Timor, entaun ami loke odamatan ba hot-hotu, no APMT hanesan partidu antigu no ami loke odamatan mós ba sira para atu la’o hamutuk hodi reforsa liu-tan Partidu Demokrátiku”, Assanami tenik tan.

Nia dehan, orientasaun polítiku mak tenki servisu maka’as atu lori no habelar nafatin ideolojia PD nian husu ba militantes, simpatizantes no delegadu PD nian tomak tantu hosi nivel aldeia to’o nasionál atu labele monu ba manobra ema seluk nian hodi hamonu PD.

“Ita tenki iha konsiensia atu vota, vota ho loloos no labele vota tuir ema ajuda ita, labele vota tanba ema sosa, labele vota tanba ema fó sasan mai ita, maibé vota ho konsiensia tanba harii estadu de demokrátiku ne’e prosesu ida, ita iha prosesu konstrusaun estadu no nasaun. Konstrusaun estadu ne’e strutura formal ida ne’e mak ita harii dadauk ona, maibé ne’e tenki enxe ho valor, entaun ida ne’e mak bolu konstrusaun nasaun nian”, tenik tan.

Tanba ne’e ema hotu tenki pratíka demokrasía ne’e ho didi’ak, tenki ka’er prinsipiu multi-partidu ne’ebé mak iha no tenki loke dalan ba partisipasaun povo tomak.

Nia mós kontinua husu ba strutura tomak hosi aldeia to’o nasionál atu kontinua kumpri no halo tuir mensajen saudozo La-Sama nian “Imi hare malu didi’ak ba tanba nasaun presiza ita”.

Tanba ne’e, husu ba strutura tomak katak, PD tenki moris no atu hamoris PD tenki hametin unidade hosi aldeia to’o iha nasionál, no PD moris atu halo balansu ba ukun.

Prezidente APMT Pedro da Costa Ramalho hatete, sira hakarak no prontu servisu hamutuk ho PD hodi lori dezenvolvimentu ne’ebé di’ak ba povo no nasaun ida ne’e.

Nune’e tuir Primeiru Vise Sekretariu Jéral, Samuel Mendonça hatete, bainhira ema hotu hakarak PD kontinua moris hodi compete iha ukun, tenki ho simplisidade, honestidade no responsablidade.

“Importante mak tenki akumula ema hotu, nune’e bele hadi’a nafatin partidu no servisu maka’as. nune’e PD mai hamutuk ho APMT tanba PD ninia polítika atu harii estadu no rai ida ne’e”, Samuel tenik tan.

Nia dehan, PD hakarak dezenvolve kultura ida ne’ebé mak refleta ba TL nian rasik. Nune’e mós Prezidente Interino, Adriano do Nascimento dehan, PD hanesan partidu joven, partidu ne’ebé buka atu kaderniza ema hot-hotu atu ba futuru bele determina povo nia moris. PD iha prinsipiu ne’ebé fundamental, iha komitmentu ne’ebé forte hakarak hamri’ik hodi determina nasaun no povo ida ne’e moris.

Adriano dehan, iha eleisaun lejislativu antes ne’e, PD hanesan partidu foun maibé latauk ho ezistensia hosi partidu seluk nian, nune’e nia promete atu iha eleisaun 2017 tuir mai hakarak lori PD manan ho asentu ne’ebé barak liu-tan kompara ho eleisaun uluk.

Atual Primeiru Vise Prezidente PN mós hatete, maske PD lakon figura importante hanesan La-Sama, maibé nia ispiritu, pasajen, istoria no matenek sei kontinua hamutuk ho PD no povo Timor-Leste.

“PD eziste atu kompete hodi ba ka’er ukun, ukun la’os de’it hosi partidu ida nian. Maibé, importante mak ita hotu tenki hametin unidade, kria paz no estabilidade hahú hosi baze no sei lori dezenvolvimentu ne’ebé sustentavel ba povo no nasaun nian ba oin ho di’ak. Unidade metin ita bele halo buat ruma”, Adriano tenik tan.

Oportunidade ne’e mós, Prezidente Interino PD, Adriano do Nascimento no Prezidente APMT, Pedro da Costa Ramalho intrega bandeira nasionál RDTL no bandeira PD nian ba reprezentante sira hosi munisípiu Ainaro, Aileu, Baucau, Dili, Ermera, Lautem, Vikeke, Manufahi no Covalima. (tay)

Timor Post