SOSIEDADE KONTRA LEI PROJETE LIDER NASIONAL

DILI - Diretór Exekutivu Fundasaun HAK, Manuel Monteiro dezkorda ho ezijensia Jeneral Lere Anan Timur ne’ebé husu atu kria lei proteje lider nasionál ho rajaun Konstituisaun RDTL la fó dalan.

Manuel Monteiro esplika, Konstituisaun RDTL iha artigo 16 hatete klaru katak, Sidadaun hotu-hotu hanesan iha lei nia oin nune’e ezijensia Jeneral Lere Anan Timur hatudu momos violasaun lei inan bainhira hakarak proteje.   

“Agora  ho deklarasaun Komandante F-FDTL Jeneral Lere Anan Timor katak, estadu tenki halo lei proteje lider Nasionál sira, ne’e hatudu momos, viola lei inan artigu 16 iha Konstituisaun RDTL, ho konteudi ema hotu iha lei nia oin hanesan,” Diretór Exekutivu Manuel Monteiro argumenta ba Timor Post, iha nia knar fatin, Farol, Segunda (03/08).

Manuel Monteiro husu atu kualker entidade ou sidadaun tantu governu inklui veteranus atu kumpri Konstituisaun RDTL.

Nune’e iha Timor Leste se de’it mak komete krimi tenki submete ba prosesu legál hanesan hetan notifikasaun, bainhira deskonfia involve krimi.

Tanba notifikasaun nudar meus ida atu fasilita prosesu investigasaun ne’ebé ikus mai deskobre kona ba verdade.

“Deklarasaun hanesan ita nia lider rejistensia no atual komandante F-FDTL, hafraku justisa ita Timor no fó marjen la di’ak  ba servisu autor judisiario sira nian. Lolos hanesan lider ida labele halo deklarasaun hanesan ne’e, ne’ebé viola ita nia lei inan,” Manuel Monteiro fó hanoin.

Hodi subliña lider hanesan Jeneral Lere tenke hasai deklarasaun ne’ebé fó garantia no korajen ba autor judisiario sira hodi halo servisu.

Sala ou los, hosik ba Tribunál  maka bele tetu hodi hakotu nia lia los.

“Bainhira koalia krimi, politika labele kahur, justisa iha nia dalan ketak ba kazu krimi, politika kestaun ketak,” Manuel Monteiro reforsa hodi halo esplikasaun ba estetmentu Lere ne’ebé hatete, “Ita hanesan rejistensia ida bainhira la iha lei ida atu proteje ita nia lider nasionál , aban bairua ita nia nasaun la hakmatek hanesan agora dadauk ema akuza Xanana Gusmão nudar arguido hosi kazu transfere kuriri droga ba Indonézia, ne’ebé involve Calisto Gonzaga.

Iha parte seluk, Diretór exekutivu Judisiario Monitorin Program (JSMP)  Luis Oleivaira Sampio sublinha kona ba  prosesu kazu transfere Kurir Droga ne’ebé Xanana Gusmão nudar Primeiru Ministru no Ministru Defesa Seguransa mak fó ordem sei la’o iha prosesu investigasaun buka evidensia inisiu.

Tan ne’e, maka tenke liu hosi investigasaun hosi Ministeru Publiku hodi bele hatene, nia responsabilidade tama iha asaun ou omisaun.

“Hosi JSMP nia haree, lei ita Timor di’ak  tebes, no protezidu sidadaun hotu, nune’e deklasaun Jeneral Lere Anan Timur  husu estadu halo lei projete lider nasionál sira, la nesesario ,no sei labele akontese,” Luis Oleivaira Sampio kontra ho rajaun konstituisaun RDTL, artigu 16 bandu.

Entertantu  Reitor Universidade da Paz, Lucas da Costa hatete, maske lider nasionál sira bele asegura sira nia futuru ho lei, maibé sira mós tenke iha responsabilidade kriminal bainhira komete krime ruma.

“Tanba ne’e lei ne’e tenke define didi’ak lai lider nasionál ida ne’ebé mak merese atu hetan asegurasaun ba nia futuru, maibé lider nasionál sira mós tenke iha responsabilidade kriminal no sivil,” Lucas da Costa lia tun ba Timor Post iha Kampus UNPAZ, Manleuana-Dili.

Tuir Lukas da Costa Timor Leste seidauk iha lei ruma kona-ba kestaundifinisaun lider Nasionál, maibé atu halo lei ne’e ita tenke ho koidadu tebes hodi hatama lider nasionál sira tuir sira nia kategoria. (max/oki/jxy)

Timor Post