LA MUDA LEI VITALISIA TAUR KONSIDERA PARPOL BUNUH DIRI

LACLO - Prezidente Repúblika (PR), Taur Matan Ruak konsidera bankada Partidu Polítika sira (PARPOL) iha Parlamentu Nasionál (PN) bunuh diri (oho-án) bainhira la-muda lei pensaun vitalisia.

“Sé sira la-altera agora iha implikasoens ba sira nia kampaña 2017, ne’e bolu dehan bunuh diri, ha’u la-fiar katak partidu sira atu oho-án”, PR Taur hatete ba jornalista sira hafoin dialogu komunitaria ho komunidade iha suku Iliheu, postu administrativu Laclo, munisipiu Mantutu, (30/7).

Xefi Estadu hatete, partidu sira ne’ebé mak hetan asentu iha PN inklui Prezidente PN, Vicente Guterres garante, sei halo alterasaun ba lei pensaun vitalisia. Tanba ne’e, Xefi Estadu fiar PN sei altera maske hatene deputadu sira iha terseiru (III) lejislatura hela de’it ona tinan ida, tanba 2017 hahú ona kampaña no eleisoens.

Nia fiar PN sei altera tanba preokupasaun kona-ba alterasaun lei pensaun vitalisia la’os hosi suku ida de’it, maibé hosi suku iha teritorio Timor laran tomak inklui Prezidente Repúblika rasik.

Nia dehan tan, liu-hosi kampaña eleitoral iha 2012, Xefi Estadu hatete sei husu ba PN hodi halo revizaun para hamenus porsentu iha pensaun ba vitalisia ka eis titulares sira tanba pursentu 100 ne’e bo’ot de mais.

“Ne’e (pensaun vitalisia-red) la’os suku ida de’it mak ko’alia inklui ha’u, ha’u kuandu sei halo kampaña ba prezidente ha’u mós husu para ko’a, ha’u la’os hatete dehan para hapus, maibé hatun tanba ami funu tinan 24, ami la-simu hanesan sira iha tinan lima nia laran”, Taur lamenta.

Admite ida ne’e i moral, PR labele fó ezemplu a’at, tanba ne’e Xefi Estadu husu para sakrifisiu ida tanba sidadaun sira la’os rona de’it saida ukun nain sira ko’alia, maibé liu-liu populasaun sira halo tuir saida mak ukun nain sira halo. (dgx)

Timor Post