MANUEL LAKON PENSAUN

Veteranu Manuel Alvez Barreto ho kodigu ‘maluk’ husi munisipiu Bobonaro lakon ninia pensaun, tamba hahu 2008 to’o agora seidauk simu mesmu nia naran taka sai ona.

Veteranu ne’e konsege ba konfirma iha komisaun homenajem, maibe nia hakfodak bainhira rona, nia osan sai tiha ona iha tinan 2008.

“Hau nia numeru bankaria seidauk loke, maibe osan ne’e dehan katak tama ona iha hau nia konta bankaria ho total $21.312,00, maibe to’o agora hau nunka simu osan sentavus ida,” Manuel duvidas.

Ho problema ne’e, nia diskunfia ema balun mak simu ona, tanba ne’e nia husu ba komisaun homenajem atu identifika lolos dadus pensaun ninia, atu labele mosu tan ba veteranus seluk.

“Hau husu ba komisaun homenagen kria komisaun ida hodi tun lalais ba halo investigasaun ba sira ne’ebe sai veteranus la los, tamba balun uluk la gosta Timor ukun an agora dadauk simu osan lancar, maibe ami sira ne’ebe mak uluk terus hodi merese atu hetan pensaun lakon direitu fali,”husu nia bainhira dadalia ho JN-Diario iha sede veteranus Bairu Grilos suku Gricenfor, Kuarta (27/1/16).

Iha fatin hanesan Sekretariadu Nasional Asosiasaun dos Kombatentes no Veteranus da Luta de Libertasaun Nasional (ACVLLN), Martinho Rodrigues Pereira sente triste, tamba Manuel Alves Barreto nia naran iha tiha, maibe la simu osan durante tinan barak.

“Hau husu ba Governu atu investiga ema balun   ne’ebe mak servisu iha komisaun homenagen, nune’e ita bele hatene lolos hodi klafika,“dehan Martinho.

Relasiona ho kazu ne’e, Diário tenta halo konfirmasaun ba komisaun homenagen, maibe Prezidente Komisaun Homenagen Virgilio Smith laiha fatin.Tos

Jornal Nacional