Autoridade Lokál Diskriminadu

Autoridade lokál hanesan xefi aldeia no xefi suku ne’e hili diretamente hosi povu iha eleisaun.  Tanba ida ne’e, sira nia autoridade boot liu ka iha lejitimidade duké funsionáriu baibain. Sira moris iha povu nia leet no rezolve komunidade sira nia problema hosi loron ba loron.

Maibé, haree hosi nível prospriedade, autoridade lokál sira diskriminadu. Sira laiha saláriu maske sira halo serbisu todan iha komunidade nia leet. Sira hetan de’it osan insentivu ne’ebé ki’ik liu iha kada fulan. Osan hirak ne’e, la sufisiente  atu sustenta sira nia moris lor-loron.

Ho tratamentu ida hanesan ne’e, bele motiva autoridade lokál sira abandona sira nia serbisu. Purke, iha parte ida, sira tenki halo serbisu alternativu seluk hodi sustenta sira nia moris no nesesidade balun hanesan haree oan sira nia eskola.

Bele mós mosu tentativu korupsaun iha atendementu ba komunidade sira. Pur-ezemplu, komunidade balun presiza autoridade lokál sira nia asinatura, maibé tenki selu.  Sé ida ne’e akontese, ita labele fó sala autoridade lokál sira tanba ne’e nesesidade. Kuandu sira la halo ida ne’e, sé maka atu sustenta sira nia nesesidade.

La rezolve problema ida ne’e, sei fó implikasaun ba komunidade sira. Razaun tanba bainhira autoridade lokál la hala’o nia funsaun ho looos, problema iha área rurál sei komplikadu no bele iha tendénsia mosu problema iha problema ida nia leten.

Ita hotu hein katak  ba futuru governu kria lei ida ne’ebé bele kria kondisaun di’ak ba autoridade lokál sira. Autoridade lokál hanesan autoridade ida ne’ebé prevene konflitus maibé sira mós bele sai autór konflitu bainhira laiha kondisaun di’ak ba sira. (*)

Matadalan