PREZIDENTE TR EVAKUA URJENTE BA SINGAPORE

Governu foti ona desizaun hodi evakua urjente Prezidente Tribunal Rekursu (TR), Guilhermino da Silva ba Singapore hodi halo tratamentu ba saude.

Primeiru Ministru Rui Maria de Araújo informa katak, Governu foti ona desizaun hodi evakua Guilhermino da Silva ba halo tratamentu espesial liu tan iha rai liur.

“Evakuasaun ne’e, ohin (horseik) ba tiha ona,” informa Rui Araújo ba Jornalista sira iha Palacio Prezidensial Aitarak Laran Dili, Kinta (28/01).

PM Rui Araújo dehan nia informa ona ba Prezidente Repúblika Taur Matan Ruak kona-ba, tratamentu médiku ne’ebé halo ba Prezidente Tribunal Rekursu ne’ebé moras iha semana kotuk liuba, baixa iha Hospital Nasionál Guido Valadares.

“Ministériu Saúde liu husi junta medika, ne’ebé tuir lei tenke foti desizaun ba kestoens sira ne’e, i deside tiha ona hodi evakua Prezidente Tribunal Rekursu ba Singapore atu halo tratamentu,” relata Rui Araújo.

Iha oportunidade ne’e mós, Xefi governu informa Presidente Republika, Taur Matan Ruak kona-ba difikuldades ne’ebé Governu infrenta, li-liu iha área Governasaun lor-loron nian.

Iha okaziaun ne’e mós, Prezidente Taur Matan Ruak mós levanta ninia kestaun balu kona-ba eletrisidade ne’ebé ninia korente sei tu’un sa’e hela hodi estraga populasaun ninia aparellu sira.

Ba preokupasaun Presidente Republika nian nee, PM Rui Araújo dehan, Governu sei haree medidas oinsa atu bele rezolve kestaun ida ne’e. cós

Jornal Nacional