JOGADOR TIMOROAN MAK IHA SENTIDU SIDADANIA

Xefi suku Vila-Verde, Postu Administrativu Vera Cruz, Munisipiu Dili, Abdul Mancoli afirma, so jogador Timoroan deit maka bele defende ninia nasaun laos jogador husi nasaun sira seluk.

Tuir nia lolos ne’e, Federasaun Futebolista Timor-Leste (FFTL) labele simu ema estranjeiru hirak ne’ebe maka agora jogu iha klubu sira hanesan Karketu, Kablaki, Sporting Dili no Benfica.

“Tanba sira nia sentidu sidadania ba ita nia nasaun ne’e laiha, se ita foti jogador rai nain TL fiar katak nia sei defende ninia rai no ninia klubu iha nasaun ne’ebe deit, tanba so Timoroan deit maka iha sentidu sidadania ba nasaun laos nasaun seluk,”Abdul Mancoli ba JN-Diário iha ninia knar fatin Sede Suku Vila-Verde-Dili, Kuarta (27/01) horseik.

Nia esplika, TL foin primeira vez foin maka forma Liga Futebol Amadora (LFA) ne’e labele lori ema husi nasaun seluk maka mai joga fali iha klubu hirak ne’ebe maka rejisti iha TL ne’e diskriminasaun ba jogador TL rai nian.

“Ne’ebe hanesan lideransa komunitaria la konkorda kuandu lori ema nasaun seluk mai kontra fali maluk Timoroan sira. Tanba ita lori jogador husi Indonesia mai joga iha klubu sira ne’ebe maka rejisti iha TL ne’e signifika ita diskrimina jogador rai nain TL, tanba jogador Timoroan ne’e barak teb-tebes soke federasaun maka laiha politika ida ke diak ba dezenvolvimentu jogador TL,”deklara xefe Suku ne’e.

Abdul hatutan, lolos ne’e FFTL tenki tetu problema ida ne’e, tanba primeira vez TL forma liga, wainhira lao kleur ona no iha ona mudansa maka bele lori ema liur mai joga hodi defende TL, maibe tenki liu husi prosesu ida.

“Governu ho Federasaun maka tenki hare’e didiak problema refere, atu nune’e ita bele deskobre liu husi prosesu saida maka ita admiti klubu ida lori ema estranjeiru mai kontra fali maluk Timoroan sira ne’ebe joga tuir klubu sira seluk,”tenik nia.

Entretantu tuir lideransa komunitaria xefi suku Motael, Cornelio de Araujo Lopez hateten, tuir lolos ne’e Timoroan rasik maka tenki envolve a’an iha klubu futebol sira laos uja fali jogador estranjeiru sira, tanba Timoroan rasik maka sai defeza ba ninia nasaun.

“Ha’u hanoin orsamentu ba desportu ne’e boot teb-tebes tanba saida maka la uja jogador Timoroan deit, hanesan liu husi treina no loke kompetisaun jogu bara-barak hodi buka Timoroan hirak ne’ebe maka iha talentu diak ba joga futebol ninian ne’e,”tenik nia. ves

Jornal Nacional